Prezidente Komisan C, Deputada Maria Angelica Rangel. Imajen/Antonio Goncalves

DILI, 09 abríl 2021 (TATOLI)—VIII Governu Konstitusionál lideradu Primeiru-Ministru (PM) Taur Matan Ruak, informa ba Parlamentu Nasionál katak ezekutivu presiza orsamentu ho montante millaun $200 hodi responde ba dezastre naturál iha territóriu nasionál.

Prezidente Komisaun C ne’ebé trata asuntu Finansa Públika, Deputada Maria Angélica Rangel, haktuir submisaun Orsamentu Retifikativu ne’ebé mak Governu submete ba Parlamentu Nasionál previstu de’it ba fundu COVID-19 liuhosu alterasaun Lei OJE 2021.

Nia esplika, kestaun mak Governu submete tiha proposta-alterasaun depois kalamidade dezastre naturál ne’ebé akontese iha loron 4 abríl.

“Afinál ita hetan dezastre boot ida ke akontese iha loron 4 abríl, ita la espera no Governu la tau osan ba ida-ne’e. Horisehik reuniaun líder bankada Ministru Asuntu Parlamentár no Komunikasaun Sosiál (MAPKOMS), hato’o katak Governu presiza orsamentu ba iha dezastre naturál por volta millaun $200,” Prezidente Komisaun C informa ba jornalista sira, iha Parlamentu Nasionál, sesta ne’e.

Nia dehan, ho informasaun hosi Governu ne’e reprezentante povu sira tenke halo ezersísiu boot hodi halo alterasaun ba rúbrika balun atubele kria fundu dezastre naturál hodi atende imediata ba situasaun atuál.

Prezidente Komisaun C ne’e akresenta, bazea ba regra bainhira Governu hatama ona proposta ba Parlamentu Nasionál entaun Governu labele halo alterasaun ruma iha iha proposta Orsamentu Retifikativu, kompeténsia Parlamentu Nasionál nian.

“Tán ne’e mak ami tenke ser servisu hamutuk ho Governu atu buka solusaun ba dezastre naturál ne’ebé mak ita-nia nasaun hasoru. Ami sei halo ezersísiu ba rúbrika orsamentál hosi ministériu balun kona-ba prioridade sira, ita sente la’ós prioridade tau fali ba iha situasaun emerjénsia ida-ne’e,” nia dehan.

Tanba ne’e mak ohin to’o loron 14 abríl, nia dehan, komisaun hotu-hotu ne’ebé mak orsamentu afeta (sofre alterasaun) sei halo audiénsia públika ho ministériu sira-ne’ebé mak sira-nia orsamentu sei halo kortes ba iha Orsamentu Retifikativu ida-ne’e.

Entretantu iha loron 06 abríl liubá, Ministru Finansa Rui Augusto Gomes husu Parlamentu Nasionál ajuda Governu hodi responde situasaun atuál, liuliu dezastre naturál.

“Hosi vizita ohin loron tomak hosi Primeiru-Ministru no komitiva identifika katak iha Dili de’it estragu ba infraestrutura bele liu millaun atus-ida, ida-ne’e situasaun urjénsia nasionál. Governu nia intensaun hakarak husu Parlamentu Nasionál atu ajuda rezolve situasaun urjénsia nasionál ida-ne’e liuhosi reforsa fundu rezerva kontinjénsia,” nia propoin ba reprezentante povu sira.

Nia argumenta, presiza reforsa tán rezerva fundu kontinjénsia atu fó biban ba Governu atende lalais nesesidade prioritária ne’ebé provoka hosi kalamidade loron rua liubá.

Nia akresenta, situasaun urjénsia nasionál presiza hetan solusaun ho lalais, ho aumentu fundu rezerva kontinjénsia bele fó biban ba Governu halo reparasaun no harii lalais infraestrutura atu normaliza konetividade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here