Ekipamentu IGE hamoos tahu iha Palásiu Prezidensiál. Imajen TATOLI/António Gonçalves

DILI, 09 abríl 2021 (TATOLI)-Prezidente Konsellu Administrasaun Institutu Jestaun Ekipamentu, Institutu Públiku (IGE,I.P, sigla Portugés), Ermenegilda da Costa Laurentina, hateten daudaun ne’e institutu esforsu hela halo normalizasaun no hasai sedimentasaun iha mota, ponte no estrada inklui edifísiu públiku ne’ebé nakonu ho tahu tanba kauza inundasaun ne’ebé akontese iha domingu (04/04).

“Ami konsege atua no apoia servisu emerjénsia iha Dili laran, liu-liu iha Pálasiu Prezidensiál ne’ebé suru sai tahu tanba nia mahar kuaze metru rua no kontinua halo servisu iha mota ulun, mota Bekusi no mota Bidau, Hospital Nasional Guido Valadares ne’ebé tahu mahar loos. Ita mós finaliza ona estrada dirasaun Dili bá Tibar ne’ebé rai monu no taka estrada,” Prezidente IGE informa hafoin partisipa reuniaun Konsellu Administrasaun Fundu Infraestrutura (KAFI) iha edifísiu Ministériu Finansa (MS), Aitarak-Laran, Dili, sesta ne’e.

Notísia relevante: IGE konsentra normaliza mota área risku ba populasaun

Daudaun instututu públiku ne’e nia volume servisu aumenta barak no hetan difikuldade iha mákina pezadu sira tanba maioria dezloka ona ba munisípiu atu halo mós intervesaun nomaliza mota no estrada sira.

Nune’e, Prezidente IGE komunika ona ho Ministru Obra Públiku, Salvador Eugênio Soares Dos Reis Pires atubele husu apoia setór privadu sira, ne’ebé daudaun empreza balun apoia ona ekipamentu pezadu hodi hasai sedimentasaun sira.

“Ita iha ona empreza hamutuk 13 mak apoia ona IGE nia servisu, tanba institutu nia lokalizasaun hahú loron 04 to’o agora hamutuk 25 iha kapitál Dili hodi halo normalizasaun no hasai sedimentasaun sira,” nia akresenta.

Iha reuniaun KAFI, deside kedan IGE serbisu hamutuk ho empreza sira ne’ebé ajuda ho gratuita no ba empreza ne’ebé iha futuru halo pagamentu presiza fó item serbisu ketak atubele halo.

“Ha’u hakarak IGE servisu mesak, maibé iha mota Bekusi ne’e Timor Port mak apoiu ekipamentu pezadu no empreza seluk ne’ebé fó apoia ona kuaze ajuda gratuita,” nia haktuir.

IGE servisu emerjénsia hahú hosi, domingu (04/04) no konsege finaliza ona servisu iha lokál 15, maibé seluk sei kontinua halo tanba depende ba estragu ne’ebé iha.

“Ami serbisu to’o kalan no sei kontinua atu halo hotu tanba hakarak garante serbisu emerjénsia nia labele hanesan fali serbisu normál ne’ebé parese semana ida ou rua, tanba bele finaliza hotu,” nia subliña.

Nune’e, IGE hakarak husu ba abitante afetadu sira ne’ebé hela besik área risku sira kontinua hein ho pasénsia tanba institutu ne’e sei to’o iha fatin hodi halo intervesaun imediata.

Entretantu, IGE mós halo intervesaun iha mota Odofuru-Daudere, Laútem, Natabora Viqueque, Alas iha mota Lacloho, mota Belolo, mota sahe, Dilor, Covalima, Bobonaro no Ataúro.

Tuir Prezidente IGE, institutu ne’e nia rekursu finansieru no umanu sufisienste hela atu atende situasaun kalamidade ne’e.

Enkuantu, funsionáriu hamutuk 250 ne’ebé maioria destaka ba munisípiu sira no iha Dili hamutuk 80.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here