Espoza Prezidente Repúblika, Cidália Nobre Lopes Mouzinho Guterres, hala’o vizita no fó apoiu umanitáriu ba vítima dezastre naturál ne’ebé refujia iha sentru evakuasaun Salaun Parókia Balide, Dili. Imajen TATOLI/Osória Marques.

DILI, 09 abril 2021 (TATOLI)—Gabinete de Apoia á Actividade do Cónjuge do Presidente do Republica (GAAC-PR) no Kaza Sivíl Prezidénsia Republika, sesta ne’e, kontinua vizita hodi presta solidariedade Xefe Estadu nian liuhosi apoiu umanitáriu ba vítima dezastre naturál ne’ebé refujia iha sentru evakuasaun salaun Parókia Balide.

Notísia Relevante: Espoza PR fó korajen no preokupa ba labarik sira-nia saúde

Hafoin hala’o vizita, Espoza Prezidente Repúblika, Cidália Nobre Lopes Mouzinho Guterres, hateten nia parte sei hato’o vitímia dezastre naturál liuliu xefe família tolu ne’ebé sira-nia uma lakon totál ne’e nia preokupasaun ba minsitériu relevante.

“Bainhira ha’u vizita fatin ne’e, vítima Luciana Soares hasoru ha’u ho matan-been. Kestaun ne’e ha’u sei informa tutan ba parte relevante tanba buat hotu tenke liuhosi nia dalan. Ha’u fila ba uma, ha’u sei dehan ba Prezidente Repúblika tuir vítima nia presiza tanba vítima ne’e lakon totál uma no sasán. Tanba ne’e mak ohin ha’u tama ba laran nia tanis haku’ak ha’u. Maibé hirak ne’e liuhosi dalan no ha’u sei hato’o hela ba sira,” Espoza PR informa ba jornalista sira, iha Salaun Parókia Balide, Dili.

Cidália Nobre Lopes Mouzinho Guterres hatutan, durante loron hirak nia-laran nesesidade bázika ne’e sufisiénte hela ba vítima dezastre naturál maibé roupa hodi hatais iha uma mak laiha.

“Ami fahe ai-han ba ita-nia vítima sira iha iha fatin-fatin maibé saida mak haree no rona hosi sira mak roupa hatais uma mak laiha inklui sana, taxu. Ida iha Hera ne’e, orsida mak ita-nia ekipa lori kompleta bá,” inan ba nasaun ne’e hateten.

Iha biban hanesan, vítima Luciana Soares husu ba Governu atu halo fali nia uma hodi nia hela bá tanba nia oan sira dook hotu hosi nia, ne’ebé oan sira atu ajuda maibé hela dook no tanba situasaun COVID-19 entaun sira labele ba-mai.

“Nune’e, ha’u husu Governu no Estadu halo uma ba ha’u no kompleta ho sasán ne’ebé bee lori tiha ona, tanba ha’u feto faluk no ho oan mane ki’ik-oan, entaun ha’u labele halo buat ida,” nia husu ba Governu.

Entretantu, Vise Koordenadór Salaun Parókia Balide, Ireneu Dias, hatete populasaun afetadu dezastre naturál hamutuk 200-resin inklui 40-resin hosi CVTL no xefe família iha 32 kompostu hosi Parókia Balide nian 23 no haruka hosi CVTL iha 12.

“Durante ne’e ami hein tebes apoiu hosi Estadu no parte relevante sira atu mai iha ami-nia fatin ida-ne’e. Maibé, ohin, ita-nia Espoza PR mai to’o iha ne’e, ami agradese. La’ós de’it apoiu umanitáriu maibé prezensa mós importante ba vítima sira atu oinsá bele fó korajen ba sira,” nia dehan.

Nia haktuir, antes ne’e empreza timoroan balun ajuda ai-han, restorante mós tulun hahan no mós hosi Governu liuhosi Sekratáriu Estadu Protesaun Sivíl (SEPS) rasik mai fahe ai-han ba vítima sira.

Tuir Koordenadór ne’e heteten, entre vítima sira-ne’e xefe família tolu mak uma estraga totál ne’e maihosi Maloa nian maibé família di’ak hotu no vítima seluk ne’e sira-nia kondisaun uma di’ak hotu maibé bee mak tama no balun uma monu.

Nesesidade bázika ne’ebé Espoza Prezidente Repúblika ho nia ekipa fahe ba vítima dezastre naturál sira mak hanesan foos, mina, susu-been, energen, indomilk, sabaun, pastadente, manta, biti, no seluk tan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here