Espoza Prezidente Repúblika, Cidália Nobre Lopes Mouzinho Guterres, vizita sentru evakuasaun hodi fó apoiu umanitáriu ba vitíma dezastre naturál. Imajen/Mídia PR.

DILI, 09 abril 2021 (TATOLI)—Xefe Kaza Sivíl Prezidénsia Repúblika, Francisco Maria de Vasconcelos, no Espoza Prezidente Repúblika, Cidália Nobre Lopes Mouzinho Guterres, kontinua presta solidariedade Prezidente Repúblika nian liuhosi apoiu umanitáriu ba família afetada iha sentru evakuasaun Ministériu Finansas Aitarak-Laran, Igreja Bedois, Aldeia Klak-Fuik no Kakeu-Laran.

Espoza Prezidente Repúblika, Cidália Nobre Lopes Mouzinho Guterres, nia prezensa iha vitima afeta dezastre naturál nia leet hodi fó korajen no husu nafatin vitima sira-nia kondisaun kona-ba saúde no uma hela fatin, tanba iha fatin familia afetadu hela ba, maiória hosi labarik kiik no bebé, ferik no katuas balun nia sofre hela moras.

“Ha’u fó korajen no husu nafatin vitima sira-nia kondisaun kona-ba saúde no uma hela fatin. Tanba iha fatin familia afetadu hela ba, maiória hosi labarik kiik no bebé, ferik no katuas balu nia sofre hela moras. Ha’u husu ba responsável kada fatin familia sira hela, komunika malu nafatin ho parte kompetente karik iha kazu moras,” Cidália Nobre Lopes Mouzinho Guterres hateten liuhosi komunikadu imprensa ne’ebé Agência TATOLI asesu, sesta ne’e.

Entretantu, reprezentante vítima dezastre naturál iha Ministeriu Finansas, Aitarak-Laran, Duarte Sarmento, agradese tebes ba espoza Prezidente Repúblika ne’ebé hala’o ona vizita hodi fó sasán nesesidade bázika ba vítima sira.

“Ami agradese tebes ba espoza Prezidente Repúblika tanba vizita ona ami no apoiu netik sasán ruma ba ami, atu to’o ka la to’o ne’e la importante tanba dezastre ne’e akontese iha fatin barak,” Duarte Sarmento hateten.

Alende ne’e, vítima sira iha sentru evakuasaun Aldeia Klak-Fuik Suku Bekora kontente ho prezensa espoza PR ho Chefe Casa Civil iha sira-nia leet, hodi haree rasik dezastre naturál ne’ebé mak afeta makaas ba aldeia Klak-Fuik no Kakeu-Laran.

Tanba ne’e, vítima sira hato’o agradesimentu ba apoiu umanitáriu maibé buat ne’ebé vítima sira presiza liu mak suru rai-henek no fatuk ne’ebé taka tomak tiha mota ligasaun hosi Beduku to’o iha Eskola Sekundária Jerál 5 de Maio Becora.

Hatán ba kestaun ne’e, xefe kaza sivíl afirma katak sei koordena ho Ministériu Obras Públika (MOP) atu haruka ekipamentu pejadu, suru sai rai no fatuk nune’e bele normaliza mota.

Iha loron datoluk ne’e, Prezidente Repúblika Francisco Guterres Lú Olo liuhosi nia espoza no xefe kaza sivíl ho nia parseiru servisu Plan Internasional, Rede-Feto no Fundasaun Sadia fó apoiu umantitáriu ba sentru evakuasaun sira mak hanesan;

Iha sentru evakuasaun Ministeriu Finanças Aitarak-Laran, fó apoiu umanitáriu ba ba uma-kain 200 ho atus foos saka 40, nina kaixa lima (5), supermie kaixa 20, biskuit 10, energen 20, indomilk 10, Jus 10, Masimidar saka ida (1), masin kaixa lima (5), sabaun kaixa 10, manta 40, biti 40, rinso daia 20 no xá kaixa lima (5).

Sentru evakuasaun iha Igreja Bedois, fó apoiu foos saka 20, mina kaixa lima (5), supermie kaixa 20, biskuit lima (5), energen 20, indomilk 10, jus sia (9), masin kaixa haat (4), sabaun kaixa lima (5), pastadente no eskoba 5×2, manta 10 no biti 20.

Iha aldeia Klak-Fuik, fó apoiu foos saka 40, mina kaixa lima (5), supermie kaixa 15, masin kaixa ida (1), sabaun kaixa lima (5), pastadente no eskoba kaixa 10, xá kaixa tolu (3), manta 20, biti 20, no iha Aldeia Kakeu-Laran ne’e fó apoiu foos saka 40, mina kaixa lima (5), supermie kaixa 15, masin kaixa ida (1), sabaun kaixa lima (5), pastadente no eskoba kaixa 10, xá kaixa tolu (3), manta 20 no biti 20.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here