Kondisaun mota Comoro durante inundasaun iha kapitál Dili, domingu (04/04). Imajen TATOLI/António Gonçalves

DILI, 08 abríl 2021 (TATOLI)-Governu liuhosi Primeiru-Ministru (PM), Taur Matan Ruak, halo ona despaixu atu kria ekipa task force halo identifikasaun no estimasaun ba kustu estragu dezastre naturál ne’ebé akontese iha domingu (04/04).

“Ita-nia kustu kálkulu ba ponte no estrada sira hamutuk millaun $100 tanba haree ba tinan kotuk, maibé hahú aban mak foin ami diskute detalla iha reniaun Konsellu Aministrasaun Fundu Infraestutura (KAFI) atu halo estimasaun ba kustu sira,” Ministru Obra Públika, Salvador Eugênio Soares dos Reis Pires, hateten ba Agência TATOLI, iha Pálasiu Governu,Dili, kinta ne’e.

Notísia relevante: Governu kálkulu kustu estragu dizastre naturál territóriu tomak millaun $100

Ekipa responsável ba identifikasaun infraestrutura no ekipamentu públiku koletivu mak sei prepara proposta finanseiru ba rekonstrusaun ka reabilitasaun.

Ekipa ne’e envolve hosi Vise Primeiru-Ministru no Ministru Planu no Ordenamentu, Ministériu Obra Públika, Ajénsia Dezenvolvimentu Nasionál (ADN), Diresaun Jerál Obra Públika, Eletrisidade de Timor-Leste, Empreza Públika (EDTL,E.P), no Bee Timor-Leste, Empreza Públika (BTL,E.P).

“Ekipa ne’e  mak hamutuk atu kuantifika ba reabilitasaun ka reparasaun estragu sira ne’ebé akontese kauza hosi inudasaun 04 abríl,” nia akresenta.

Daudaun ne’e, Governu nia prioridade mak halo normalizasaun no hamoos sedimentasaun no limpeza jerál.

Nia  informa, Governu sei fahe ona tarefa hafoin halo kordenasaun ho setór privadu balun ne’ebé ajuda ona ekipamentu pezadu sira hodi halo normalizasaun ba mota sira iha parte balun no parte balun fali Institutu Jestaun Ekipamentu, Institutu Públiku (IGE.I.P, sigla protugés) mak halo.

Inudasaun ne’e akontese kuaze iha territóriu tomak, la’ós iha Dili de’it, ne’ebé IGE halo intervesaun ba mós iha munisípiu sira.

Kona-ba ponte Loes ne’ebé kotu, tuir Ministru ekipa mós sei kuantifika hodi dezeñu no halo reabilitasaun.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here