Primeiru-Ministru, Taur Matan Ruak, hamutuk ho entidade relevante observa direta estrada protokolu Praia dos Coqueiros ne’ebé hetan estragus hosi dezastre naturál, tersa (06/04/21). Imajen Tatoli/Egas Cristóvão.

DILI, 06 abríl 2021 (TATOLI)—Primeiru-Ministru (PM), Taur Matan Ruak, hamutuk ho entidade relevante halo observasaun direta ba infraestutura hanesan ponte no estrada ne’ebé hetan estragu hosi inundasaun ne’ebé akontese iha domingu ne’e, iha kapitál Dili.

Tuir  Xefe Governu, kálkulu ba estragu infraestutura hahú hosi iha munisípiu Dili no munisípiu seluk ho valór orsamentu millaun $100.

“Governu halo buat hotu tuir kbi’it atu normaliza no hadi’a, inklui ajuda populasaun diminui risku ba sira-nia moris,” PM Taur hateten hafoin halo observasaun hahú hosi mota Comoro to’o Hera, tersa ne’e.

Primeiru-Ministru, Taur Matan Ruak hamutuk ho entidade relevante observa direta fatin estragu tanba dezastre naturál, tersa (06/04) Imajen TATOLI/Egas Cristóvão

Vizita ne’e akompaña hosi Vise Primeiru-Ministru no Ministru Planu Ordenamentu, José Reis no Ministru Obra Públiku, Salvador Eugênio Soares dos Reis Pires, inklui Prezidente Insitutu Jestaun Ekipamentu, Institutu Públiku (IGE, I.P) no Diretór sira.

Vizita ne’e hanesan observasaun direta ba fatin sira ne’ebé hetan impaktu grave liu ba infraestutura hanesan ponte no estrada inklui komunidade nia uma.

“Ha’u orienta ona Vise Primeiru-Ministru no Ministru Obra Públika hodi tau-matan no buka meiu atu normaliza no hadi’a infraestutura iha Dili laran no munisípiu sira ne’ebé hetan estragu tanba inundasaun. Ha’u husu atu sira halo planu di’ak ho emerjénsia atu hadi’a filafali,” nia akresenta.

Kona-ba estragu  infraestutura, sei lidera hosi Vise Primeiru-Ministru no Ministru Obra Públika, atu tau matan.

Primeiru-Ministru, Taur Matan Ruak hamutuk ho entidade relevante observa direta fatin estragu tanba dezastre naturál, tersa (06/04) Imajen TATOLI/Egas Cristóvão

“Iha tinan kotuk ita konsege halo buat balun no redús balun, la’ós totalmente evita, maibé redús de’it nia risku maski tinan ne’e dezastre naturál grave no estraga infraestutura hotu inklui komunidade nia uma,” nia hatutan.

Enkuantu, kona-ba apoia umanitária, Governu organiza ba grupu rua ne’ebé lidera hosi Ministériu Administrasaun Estatál no Sekretaria Estadu Protesaun Sivíl atu tau-matan ba fatin evakuasaun vítima dizastre naturál iha Dili laran hamutuk 12.

“Fó apoia hahán, halo limpeza iha fatin sira ne’ebé hetan inundasaun, sira ne’ebé uma laiha buka apoia no sira ne’ebé uma sei iha hela organiza atu fila ba fatin,” PM subliña.

Sekretáriu Estadu Protesaun Sivíl (SEPS), Joaquin Gusmão, tersa ne’e, hala’o observasaun direta ba iha fatin akontesimentu dezastre naturál iha área Bee-duku, Aldeia Moris Foun, Suku Comoro, Postu Administrativu Don Aleixo, Munisípiu Dili. Imajen Tatoli/Nelson de Sousa

Biban ne’e, Xefe Governu manifesta solidaridade ba vítima dizastre naturál iha territóriu laran tomak.

“Hakarak lori Governu nia naran, fó solidaridade no sentidu kondólensia ba família hotu ne’ebé lakon nia oan, inan no aman no lakon sasán no uma tanba dezastre naturál ida ne’e no ita tenke hamutuk enfreta no tau-matan ba sira ne’ebé susar,” nia dehan.

Dezastre naturál ne’e konsege halo ema na’in 27 lakon vida iha territóriu tomak lakon vida, tanba ne’e Xefe Ezekutivu konsidera situasaun ne’e koko forsa no vontade atu hamutuk tanba povu Timor-Leste hanesan luta na’in.

“Ita la tauk no ita luta nafatin hodi tau-matan ba sira ne’ebé moris susar no klaru iha sorin seluk ita tanis ba ita-nia ema sira ne’ebé mate, maibé iha sorin seluk tenke tau-matan ba sira ne’ebé terus,” nia hatutan.

Nia mós husu sidadaun hotu atu hamutuk enfreta situasaun ne’e liuhosi apoia umanitária ba afetadu sira atu hakma’an sira-nia susar.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here