Primeiru Ministru (PM), Taur Matan Ruak, hatudu hela sertifikadu vasinasaun COVID-19, hafoin simu vasina AstraZeneca iha Sentru Saúde Formosa Dili, kuarta (07/04/21). Imajen Tatoli/António Gonçalves.

DILI, 08 abríl 2021 (TATOLI)—Sala Situação Centro Integrado Gestão de Crise (SS-CIGC), rejista kazu pozitivu foun COVID-19 hamutuk na’in 70, detetadu iha Dili hamutuk 53 no Munisípiu-sira seluk iha 17, kazu rekoperadu na’in 48 no númeru pasiente atuál 515.

“Kazu foun 70, rekoperadu 48 no totál kazu ativu 515. Hosi totál kazu detetadu foun ohin iha mane 46 no feto 24, sintomátiku na’in-haat, asintomátiku na’in 66,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai dadus ne’e, liu hosi konferénsia imprensa iha Centro Convenções Dili (CCD), sesta ne’e.

Notísia relevante:COVID-19: pozitivu foun 98, rekoperadu 90 no ativu 493

Evolusaun iha Munisípiu Dili, ne’ebé ohin deteta kazu foun 53, kompleta kazu pozitivu iha Munisipiu ne’e hosi 7 marsu to’o 9 abríl 2021, hamutuk hotu 742.

Ho baze ba informasaun ne’ebé disponível, ekipa konjunta saúde halo fali revizaun ba foku propagasaun ka cluster iha Munisípiu Dili ho baze ba ligasaun entre kazu iha área jeográfika no espozisaun ba fonte infesaun.

Suku sai nu’udár área jeográfika ne’ebé uza hanesan baze, nune’e foku propagasaun ka cluster hetan revizaun tuir totál  kumulativu kazu konfirmadu, hahú deteta 7,14,21,28 marsu no 4,5,6,7,8 9 abríl, Suku Madohi 20, Suku Comoro  134, Suku Fatuhada 103, Suku Bebonuk 107, Suku Manleuana 16, Suku Campo Alor 17,  Suku Bairro Pité 24, Suku Vila-Verde  25, Suku Motael 14, Suku Caicoli 11, Suku Mascarenhas ida, Suku Lahane Ocidentál haat, Suku Lahane Orientál 19, Suku Santa-Cruz 11, Suku Becora 39, Suku Kukuhun 28, Suku Bidaun Santa Ana 22, Suku Camea ida, Kuarentena 15, Clinica Bairro Pité tolu, Quartél General F-FDTL haat, Ataúro tolu, CCD neen.

Ho nune’e, iha Munisipiu Dili, reorganiza cluster tuir área jeográfika suku-nian ho fatin propagasaun seluk mós, hamutuk hotu iha cluster 23.

Evolusaun iha Munisípiu Baucau, ohin deteta tan kazu foun ida. Kazu pozitivu ne’e ba hosi Dili. Hamutuk hotu iha Baucau iha kazu 35 ne’ebé detetadu.

Ho baze ba informasaun ne’ebé disponível, ekipa konjunta saúde halo fali revizaun ba foku propagasaun ka cluster iha Munisípiu Baucau ho baze área jeográfika. Totál iha cluster iha Baucau hamutuk lima.

Evolusaun iha Munisípiu Manatuto, ohin deteta kazu foun ida. Kazu ida ne’e halo viajen hosi Dili.

Evolusaun iha Munisípiu Covalima, ohin deteta tan kazu pozitivu 13. Kazu pozitivu hirak ne’e halo viajen hosi Dili iha 7 abríl 2021.

Evolusaun iha Munisípiu Lautém, ohin deteta tan kazu pozitivu rua. Kazu hirak ne’e, kuarentena iha Lospalos.

“Evolusaun iha Munisípiu-sira seluk ho RAEOA, ohin la deteta kazu foun,” doutór Rui Maria de Araújo subliña.

Hosi horisehik mai ohin, Laboratóriu Nasionál Saúde (LNS) halo ona teste PCR ba ema na’in 745, inklui  testes 516 ba ema ne’ebé halo pedidu atu hetan autorizasaun esesionál hodi sai hosi serka sanitária iha Munisípiu Dili.

Totál pedidu autorizasaun esesionál atu sai hosi serka sanitária iha Munisípiu Dili, hosi 6 to’o 8 abríl, hamutuk hotu 431. Sekretariadu CIGC responde hotu kedan, maibé  pedidu 42 la prienxe kritériu tuir Rezolusaun Governu.

SS-CIGC apela ba populasaun Timor-Leste tomak, liu-liu iha Dili no Munisípiu-sira ne’ebé afetadu ho inundasaun iha loron hirak ne’e nia laran, ba sira ne’ebé maski lakon uma, sasan no hela fatin, no tenki evakua ba fatin públiku-sira, halo favór nafatin uza meiu hotu ne’ebé iha atu hado’ok-an hosi kontájiu moras COVID-19, liu-liu nafatin uza mákcara, no fase liman beibeik.

Husu mós ba populasaun ne’ebé provizoriamente tenki hela iha sentru evakuasaun-sira, atu kolabora ho ekipa konjunta saúde, hodi foti amostra ba análiza laboratóriu.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here