Ekipa saúde hatudu hela ekipamentu ne’ebé sei uza hodi halo vasinasaun AstraZeneca, iha Klínika Bairru Formosa, kuarta (07/04/21). Imajen Tatoli/ António Gonçalves.

DILI, 08 abríl 2021 (TATOLI)—Sala Situação Centro Integrado Gestão de Crise (SS-CIGC), rejista kazu pozitivu foun COVID-19 durante loron rua (7-8 abríl) hamutuk na’in 98, kazu rekoperadu na’in 90 no númeru pasiente atuál 493.

“Kazu foun 7-8 abríl 98. Númeru ne’e, 67 iha Dili, 31 iha Munisípiu-sira seluk. Kazu rekoperadu iha loron rua ne’e 90. Totál kazu ativu 493. Hosi totál kazu foun ohin mane 57 no feto 41 ne’ebé hotu-hotu asintomátiku,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai dadus ne’e, liu hosi konferénsia imprensa iha Centro Convenções Dili (CCD), kinta ne’e.

Notísia relevante:COVID-19: kazu mate ida, pozitivu 13 no ativu 485

Kazu foun 67 ne’ebé detetadu iha Munsípiu Dili, kompleta kazu detetadu iha Munisipiu ne’e hosi 7 to’o 8 abríl hamutuk hotu 689.

Ho baze ba informasaun ne’ebé disponível, ekipa konjunta saúde halo fali revizaun ba foku propagasaun ka cluster ho baze ba ligasaun entre kazu iha área jeográfika no espozisaun ba fonte infesaun.

Suku sai nu’udár área jeográfika ne’ebé uza hanesan baze, nune’e foku propagasaun ka cluster hetan revizaun hanesan tuir mai, total kumulativu kazu tuir data hahú deteta 7, 14,21,28, 29, 30 no 31 marsu, inklui 1,2,3, 4, 5, 6, 7, no  8 abríli, Suku Madohi  20, Suku Comoro 106, Suku Fatuhada 100, Suku Bebonuk  107, Suku Manleuana  13, Suku Campo Alor  16, Suku Bairro Pité 24, Suku Vila-Verde  23, Suku Motael 14, Suku Caicoli tolu, Suku Lahane Oriental 18, Suku Santa-Cruz  10, Suku Becora  39,  Suku Kukuhun  28, Suku Bidaun Santa Ana  22, Suku Camea 11, Kuarentena 15,  Clinica Bairro Pité tolu, Quartel General F-FDTL haat,  Ataúro tolu, CCD lima.

Ho nune’e, iha Munisípiu Dili, reorganiza cluster tuir área jeográfika suku-nian ho fatin propagasaun seluk mós, hamutuk hotu iha 21 cluster.

Evolusaun COVID-19 iha Munisípiu Liquiça iha 5 abríl deteta kazu pozitivu tolu iha Postu Administrativu Maubara. Ema sira ne’e, ba hosi Dili no oras-ne’e daudaun sira hala’o izolamentu iha Dili.

Evolusaun iha Munisípiu Baucau iha 7 no 8 abríl  deteta kazu foun lima. Kazu pozitivu hirak ne’e ba hosi Dili. Hamutuk hotu iha Baucau iha kazu 34 detetadu, iha cluster 11.

Evolusaun COVID-19 iha Munisípiu Ermera iha 7-8 abríl deteta kazu foun 20. Kazu pozitivu hirak ne’e ba hosi Dili no lori fila mai izolamentu iha Dili. Ekipa konjunta saúde buka-tuir ona kontaktu-besik sira hotu.

Evolusaun iha Munisípiu Covalima, iha 7 abríl deteta tan kazu pozitivu ida. Kazu pozitivu ida-ne’e halo viajen hosi Dili iha 2 abríl.

Evolusaun iha Munisípiu Ainaro, iha 7 abríl  deteta kazu foun lima. Kazu pozitivu hirak-ne’e ba hosi Dili no lori mai izolamentu iha Dili. Ekipa konjunta saúde buka-tuir ona kontaktu-besik sira hotu.

Hosi 7-8 abríl Laboratóriu Nasionál Saúde (LNS) halo teste PCR ba ema hamutuk 1.125, inklui teste 530 ba ema ne’ebé halo pedidu atu hetan autorizasaun esesionál hodi sai hosi serka sanitária iha Munisipiu Dili.

Kona-bá kazu detetadu ho kategoria moderadu na’in-tolu iha Vera-Cruz, Lahane, alta ona iha 7 abríl. Kazu detetadu ho kondisaun grave na’in-ida mak sei iha Vera-Cruz, Lahane. Kondisaun ohin, dia 8 abríl diak, maski sei nafatin uza oksijéniu liu hosi kánula.

SS-CIGC apela ba populasaun Timor-Leste tomak, liu-liu iha Dili no Munisípiu-sira ne’ebé afetadu ho inundasaun iha loron hirak ne’e nia laran, ba sira ne’ebé maski lakon uma, sasan no hela fatin, no tenki evakua ba fatin públiku-sira, halo favór nafatin uza meiu hotu ne’ebé iha atu hado’ok-an hosi kontájiu moras COVID-19, liu-liu nafatin uza mákcara, no fase liman beibeik.

Husu mós ba populasaun ne’ebé provizoriamente tenki hela iha sentru evakuasaun-sira, atu kolabora ho ekipa konjunta saúde, hodi foti amostra ba análize laboratóriu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here