Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 09 abríl 2021 (TATOLI)—Parlamentu Nasional (PN) liuhosi Komisaun Espesializada Permanente (KEP) hahú halo audiénsia públika ho Governu kona-ba alterasaun Orsamentu Jerál Estadu (OJE) 2021.

 “Komisaun C halo ona aprovasaun ba kalendáriu no ohin komisaun balun halo ona audiénsia ho Governu to’o iha loron 14 abríl 2021,” Prezidente Komisaun C ne’ebé trata asuntu Finansa Públika, Deputada Maria Angélica Rangel, informa ba jornalista sira, iha uma fukun, sesta ne’e.

Nia dehan, bainhira termina audiénsia ho Governu sei kontinua kedas ba faze jeneralidade iha loron 20 abríl no sei termina iha 27 abríl iha final globál, no loron 28 abríl Komisaun C sei haruka ba Prezidente Parlamentu Nasionál hodi haruka kedas ba iha Prezidente Repúblika.

Entretantu audiénsia públika ba loron ohin mak hanesan Komisaun D ne’ebé trata asuntu Ekonomia no Dezenvolvimentu audiénsia ho Ministru Koordenadór ba Asuntu Ekonómiku (MEKAE) Joaquim Amaral, Ministru Turizmu Komérsiu no Indústria (MTKI) José Lucas do Carmo da Silva, Sekretáriu Estadu Kooperativa SEKOOP Elizário Ferreira no Sentru Lojístika Nasionál iha sala plenária.

Nune’e mós Komisaun G ne’ebé tarata asuntu Edukasaun, Juvetnude, Kultura no Sidadania halo audiénsia ho Ministru Edukasaun, Juventude no Desportu (MEJD) Armindo Maia no Sekretáriu Estadu Juventude no Desportu (SEJD) Abrão Saldanha iha rezidénsia Prezidente Parlamentu Nasionál, Farol, Dili.

Purtantu proposta-altersaun alterasaun ne’e Governu propoin millaun $223,8 espesiál de’it ba Fundu COVID-19.

Prezidente Komisaun C (Finanasa Públika), Deputada Maria Angélica Rangel, esplika proposta-lei ne’e hodi altera lei OJE 2021 tanba OJE 2021 prevee de’it millaun $31 entaun la sufisiénsia.

Nia argumenta, proposta-lei ne’e refere ho prosesu tramitasaun urjénsia ho títulu simples no objetu rua mak hanesan prosede primeira-alterasaun ba OJE 2021 aprovadu hosi lei númeru 14/2020, 29 dezembru, no aprova mós medida hodi halo mitigasaun impaktu sósiu-ekonómika durante vijénsia pandemia COVID-19.

“Proposta orsamentu retifikativu ne’e hodi halo alterasaun Lei OJE 2021 ne’ebé ami aprova ona ne’e, artigu balun seidauk iha lei ne’e tenke halo alterasaun hodi halo no hatama tán ba Lei OJE 2021 ne’e,” Prezidente Komisaun C fundamenta.

Antes ne’e, Ministru Finansa, Rui Gomes, hateten prioridade Governu nian liuhosi orsamentu retifikativu ba Lei OJE 2021 hodi halo prevensaun no kombate pandemia, nomeadamente akizisaun vasina, ekipamentu protesaun individuál, materiál ba teste nian.

Nune’e mós materiál ba médiku kona-ba tratamentu moras internadu, konstrusaun no arrendamentu ba izolamentu no kuarentena lokál foun no hasa’e kapasidade ezistente lokál ne’ebé iha ona.

Medida Governu nian liuhosi orsamentu retifikativu hodi oferese subsídiu estraordinária ba traballadór sira-nia konta própria ne’ebé dedika-aan iha Estadu Emerjénsia, ba mós emprezáriu em nome individuál, traballadór servisu doméstiku no jerente sira.

Iha proposta-alterasaun ba Lei OJE 2201 ne’e mós prevee ba subsídiu estraordinária ba dezempregu, subsídiu estraordinária ba eletrisidade, subsídiu estraordinária de venda, moratória kréditu, izensaun propina ba estudante sira, subsídiu asesu internet ba estudante sira no distribuisaun alimentu.

Proposta-lei ne’ebé prosede ba primeira alterasaun ba OJE 2021 artikulada ho artigu hamutuk 18 ne’ebé distribui ba kapítulu 4, anexu 1 ho tabela orsamentál 3.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here