Sasán nesesidade báziku ne’ebé Gabinete de Apoia á Actividade do Cónjuge do Presidente do Republica (GAAC-PR) fahe ba vítima dezastre naturál ne’ebé hela iha sentru evakuasaun sira iha Dili. Imajen/Mídia PR.

DILI, 09 abril 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, informa apoiu umanitáriu ne’ebé durante ne’e Espoza PR fahe ba vítima dezastre naturál maihosi Gabinete de Apoia á Actividade do Cónjuge do Presidente do Republica (GAAC-PR).

“Fundu ne’e maihosi GAAC-PR no mós hetan tan tulun hosi Governu Xina liuhosi Fundasaun Sadia no parseiru sira hanesan Rede Feto, Plan Internasional no seluk tan bazea ba programa ka atividade Espoza PR nian,” Cidália Nobre Lopes Mouzinho Guterres informa ba Agência TATOLI, iha BTN I Tasi Tolu, Dili, sesta ne’e.

Inan nasaun Timor-Leste ne’e haktuir, programa Gabinete de Apoia á Actividade do Cónjuge do Presidente do Republica (GAAC-PR) nian tinan-tinan, Governu Xina sempre fó fundu liuhosi Fundasaun Sadia para gabinete bele hala’o nia planu no atividade sosiál sira.

Espoza PR ne’e hateten, tuir loloos ne’e fundu hirak ne’e atu uza ba edukasaun nian liuliu ba eskola infantil hodi sosa kadeira no karteira sira inklui materiál labarik infantil nian ba tinan ida-ne’e, maibé mosu COVID-19 entaun labele realiza tanba atividade eskolár suspende entaun osan ne’e uza fali ba asaun karitativa.

“Agora inundasaun akontese halo ema barak sai vítima entaun osan ida-ne’e ami uza fali ba asaun karitativa. Tanba, momentu ne’e komunidade afetadu sira presiza tulun hosi ita liuliu apoiu sasán nesesidade bázika nian,” nia hateten.

Iha Espoza PR nia vizita iha sentru evakuasaun BTN I Tasi Tolu ne’e, vítima dezastre naturál ne’ebé refujia iha fatin ne’e hato’o sira-nia preokupasaun kona-ba bee-moos no kontentór lixu nian.

Hatán ba ida-ne’e, nia dehan, nia parte sei informa ba Governu tanba buat ne’ebé Gabinete Espoza PR ho parseiru sira fó apoiu ne’e tuir kbiit ne’ebé ekipa ne’e iha no ekipa labele halo liu fali Governu, maibé Governu mak sei atende kona-ba kestaun hirak ne’e.

Entretantu vítima afetadu dezastre naturál hosi 12 de Outubru, Agostinha de Araújo, hateten maske sira afetadu inundasaun maibé sira sente urgullu tanba inan nasaun bele hala’o vizita to’o sira-nia fatin hodi haree direta sira-nia kondisaun atuál.

Nia hateten, xefe família iha BTN I hamutuk 150 no maiória labarik kiik-oan inklui inan isin rua mak barak liu.

Sasán nesesidade bázika ne’ebé Gabinete Espoza PR distribui ba vítima dezastre naturál sira iha sentru evakuasaun BTN I Tasi Tolu mak: foos saka 25, mina kaixa 5, energen 10, indomilk 10, jus 10, masin kaixa rua (2), sabaun kaixa lima (5), pastadente no eskova 10, manta 40, biti 40 no rinso daia 10.

Entretantu, sasán nesesidade bázika ne’ebé Gabinete Espoza PR distribui ba vítima dezastre naturál sira iha sentru evakuasaun Salaun Parókia Balide mak: foos saka 40, mina kaixa 19, energen 10, indomilk 10, jus 10, masin kaixa lima (5), sabaun kaixa 10, pastadente no eskova 10, manta 40, biti 40, rinso daia 10 no supermie dos rua (2).

Ba vítima afetadu ne’ebé hela sentru evakuasaun iha 30 de Agostu, Gabinete Espoza PR distribui foos saka 22, mina kaixa 10, energen 10, indomilk 14, masin kaixa haat (4), sabaun kaixa 10, pastadente no eskova 10, manta 40, biti 40, rinso daia 20, xá rua (2), jus 20, no biskuit 10.

Iha sentru evakuasaun Suku Fatuhada, Gabinete Espoza PR distribui foos saka 30, mina kaixa 10, energen 10, indomilk 15, masin kaixa haat (4), sabaun kaixa 10, pastadente no eskova 10, manta 40, biti 40, rinso daia 10, xá rua (2) no jus 10.

Notísia Relevante: Espoza PR sei hato’o vítima nia preokupasaun ba ministériu relevante

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here