Manatuto-anan fó apoiu ai-han ba vitíma dezastre naturál iha Munisípiu Manatuto. Imajen/Espesiál

DILI, 06 abríl 2021 (TATOLI)- Lider Karizmátiku, Kay Rala Xanana, segunda to’o tersa (05-06/04), organiza no halibur intelektuál Manatuto-anan  hodi halo asaun solidariedade fó apoiu ai-han ba vítima dezastre naturál na’in-520 iha Munisípiu Manatuto.

Abitante na’in-520 ne’e horik iha  suku lima (5) maka hanesan, Suku Uma Kaduak, Lacu  Mesak, Uma Naruk, Laicore no Uma Caduak, Postu Administrativu Laclo no vitíma balun iha Manatuto Vila  ne’ebé sofre dezastre naturál, udan, anin no rai-halai iha sábadu-domingu (03-04/04/2021).

Notísia Relevante : PN aprova votu pezár ba vítima dezastre naturál

Apoiu ai-han ne’e kompostu hosi foos saka 30, supermi (doos-30), ikan lata sardina (kaixa-10), rinso (kaixa-lima/5), mina litru ida (1) (kaixa-lima/5), masin-midar karon-lima (5) no seluk tan.

Xanana Gusmão tatoli lia hosi ekipa ne’ebé ba fahe apoia ai-han ba vitíma sira iha Manatuto, tersa ne’e, hateten mezmu ai-han ne’e apoiu ho kuantidade ki’ik, maibé nu’udar jestu solidariedade hanesan Manatuto-oan hodi tulun vítima sira ne’ebé hetan susar.

Iha Dili, Xanana fó hanoin ba vítima sira katak, dezastre ne’ebé akontese la’ós de’it territóriu iha Timor-Leste, maibé povu nasaun viziñu sira iha Kupang-Indonézia mós sofre hanesan ho povu Timor-Leste, tanba ema mate, sasán no uma hetan estragus, inklui animál sira hanesan, karau, bibi no fahi mate, tanba bee lori.

Hafoin udan boot iha sábadu to’o domingu (03-04/04), Xanana Gusmão ho nia seguransa sira,, ne’ebé akompaña mós hosi Agência Tatoli, halo vizita ba haree direita vítima sira mota sobu sira-nia uma iha Bidau, Becora, Manleuna, Comoro no fatin seluk tan hodi espresa ninia domin no solidariedade ba povu.

Komandante Em-Xefe FALINTIL ne’e apela ba Timoroan hotu atu la bele lakon esperansa ba dezastre naturál ne’ebé akontese no husu atu nafatin kolabora malu hodi nune’e bele haku’ur liu lalais situasaun krusiál ne’e.

Iha tempu hanesan, Xanana halo vizita solidariedade ba haree komunidade sira ne’ebé halai ba haksumik-an  iha área Sentru Dom Bosco Comoro, Madre Canossiana Manleuana, Becora no Hera nian no área Becora nian.

Ema na’in-lima seidauk hetan

Hosi sorin seluk, Administradór Postu Administrativu Laclo, Samuel Rodrigues Pereira, hato’o agradese   ba  Kay Rala Xanana Gusmão ho intelektuál Manatuto-oan sira, ne’ebé mobiliza malu hodi apoia ona vitíma dezastre naturál sira iha Manatuto.

Autoridade sira ne’e preokupa dezastre naturál ne’ebé akontese provoka udan, anin halo inundasaun maka’as rezulta ema na’in-neen; kompostu hosi  na’in ida nia sin mate hetan ona, maibé nain-lima seluk seidauk hetan.

“Ami nia komunidade na’in-neen  (6) maka lakon vida, entre vítima na’in-neen (6) ne’e, nia lima maka seidauk hetan to’o agora,” Samuel Rodrigues hateten.

Dezastre ne’e estraga direita povu nia natar kuaze 5.000 no estraga to’os hamutuk ektare 200, no mós sobu mós kolam ikan 60 ne’ebé atu koleta daudaun.

Dezastre ne’e estraga mós plantasaun ai-han no bee lori komunidade nia animal karau luhan neen (6), bibi luhan lima  (5), inklui animal ki’ik sira seluk hanesan manu no asu sira mota lori.

Tuir dadus ne’ebé autoridade sira rekolla, uma kain-tolu (3) hetan estragus totál iha Postu Administrativu Laclo. Uma kain-25 bee tama no uma kain 28 sai ameasa boot ba inundasaun.

Oras ne’e daudaun komunidade sira evakua provizóriu ba sede suku ne’ebé besik no Salaun Parókia hodi hein to’o situasaun rekupera sira sei fila atu hadi’a sira-nia horik fatin.

 Jornalista   : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here