Estrutura UNTL hala’o serimónia abertura tinan akadémiku 2021, iha Auditóriu Liceu, Kinta (08/05). Imajen Tatoli/Egas Cristóvão.

DILI, 08 abríl 2021 (TATOLI)—Universidade Nasionál Timor Lorosa’e (UNTL) hala’o abertura ba Tinan Letivu 2021 nian, liu hosi Live Streaming iha Auditóriu Liceu UNTL, Díli, kinta ne’e.

Iha diskursu, Reitór, João Soares Martins, hateten komunidade akadémika labele marka hotu prezensa tanba iha hela periúdu Serka-Sanitária, maibé lori universidade nia-naran hato’o bem vindo ba estudante foun-sira iha uma-UNTL.

Notísia relevante:Reitór UNTL la publika anunsiu ofisiál taka totál ensinu aprendizazen

Reitór subliña katak, hahú hosi 8 abríl UNTL hanesan mós estudante foun sira-nia uma-matenek hodi hala’o idaidak-nia perkursu akadémiku no realizasaun mehi iha área ne’ebé hili ona.

“Mai estuda iha UNTL la’ós fasil no la’ós difisil mós, maibé estrutura universidade nian, hamutuk ho dosente no funsionáriu hotu prontu atu serbí, nune’e universidade bele garante estudante hotu sei hetan kualidade di’ak no jestór ba imi-nia koñesimentu rasik hodi kontribui ba Timor-Leste”, Reitór ne’e hateten.

João Martins mós informa katak, atividade orientasaun akadémika ba estudante foun sei realiza bainhira situasaun permite no iha tempu badak UNTL sei fó-sai informasaun kona-bá atividade akadémika, liuliu aula ba estudante foun.

Iha fatin hanesan, Vise-Reitór Asuntu Akadémiku no Garantia Kualidade, Samuel Venâncio de Sousa Freitas, hateten, hosi estudante 5.282 ne’ebé admitivu ba UNTL, no rejistadu hamutuk 4.473 reprezenta (84.7%) no seidauk rejista hamutuk 809 reprezenta (15.3%).

Maski TL enfrenta hela surtu COVID-19, maibé parte UNTL konsege rejista ona estudante hosi Fakuldade Agrikultura 448 no seidauk rejistu 94, Enjeñaria Siénsia no Teknolojia 453 no seidauk rejistu 76, Edukasaun, Arte no Umanidade rejistadu 1.102 no seidauk rejistu 202, Medisina no Siénsia Saúde rejistadu 652 no seidauk rejistu 31, Ekonomia no Jestaun rejistadu 713 no seidauk rejistu 155, Direitu rejistadu 152 no seidauk rejistu 19, Siénsia Sosiál rejistadu 751 no seidauk rejistu 174, Filozofia no Siénsia Umana 131 no seidauk rejistu 40, enkuantu Siénsia Ezata rejistadu 89 no seidauk rejistu 27.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here