Reitór UNTL, João Soares Martins. Imajen Tatoli/Egas Cristóvão.

DILI, 17 marsu 2021 (TATOLI)—Reitór Universidade Nasionál Timor Lorosa’e (UNTL), João Soares Martins, la publika anunsiu ofisiál hodi taka totál prosesu aprendizazen to’o 2022.

Reitór João Soares fó-sai deklarasaun ne’e relasiona ho ema balun ne’ebé lansa informasaun iha média sosiál katak, sei hapara totál prosesu aprendizazen iha UNTL to’o 2022.

Notisia relevante:Reitór João Martins iha motivasaun hadia kualidade UNTL

“Ha’u rezeita totál informasaun ne’ebé fó-sai iha média sosiál katak, ha’u sei taka totál prosesu aprendizazen to’o 2022,” Reitór UNTL hateten ba jornalista Agência Tatoli iha ninia serbisu fatin kampus UNTL, kuarta ne’e.

Nia esplika, nornalmente atu taka totál atividade iha UNTL, la’ós reitór mak foti mesak desizaun maibé presiza halo diskusaun uluk ho Konsellu Jestaun, Konsellu Jerál, inklui Ministériu Ensinu Superiór Siénsia no Kultura (MESSK).

“Apela ba publiku katak, informasaun iha média sosiál ne’e la loos, bosok no inventável, tanba laiha data emisaun inklui númeru referénsia,” nia apela.

Nia mós hakarak konsentra ba serbisu ne’ebé produtivu hodi lakohi hatene liutan pesoál ne’ebé mak halo asaun ida ne’e, tanba sei lakon tempu no enerjia ba buat ne’ebé laiha valór.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here