Abitante iha mota-ibun Ponte Comoro III kona impaktu inundasaun iha domingu (04/04). Imajen TATOLI/António Gonçalves

DILI, 07 abríl 2021 (TATOLI)- Dadus provizóriu hosi Sekretária Estadu Protesaun Sivíl (SEPS) to’o kuarta ne’e, rejista iha ema na’in-42 mak lakon vida hosi dezastre naturál iha territóriu nasionál.

Notísia Relevante : Dezastre naturál iha TL, ema 21 lakon vida

Hosi númeru ema lakon vida ne’e,  nai’n-22 iha Dili no  na’in-20 iha munisípiu sira no dadus SEPS nian mós konfirma katak iha Aldeia Airalau, Suku Aituto, Postu Administrativu Maubisse, Munisípiu Ainaro, ema na’in-10 maka lakon vida no na’in-lima maka to’o agora seidauk hetan sira nia mate-isin.

Iha Postu Administrativu Remexio, Munisípiu Aileu, ema na’in-rua (2) lakon vida no iha Viqueque ema na’in-tolu (3) mós lakon vida.

Iha fali Postu Administrativu Laclo, Munisípiu Manatuto,  iha ema na’in-lima (5) maka lakon vida, maibé ema na’in-haat maka seidauk hetan sira-nia mate-isin.

Iha Munisípiu Dili, tuir dadus SEPS nian, iha Postu Administrativu Cristo Rei, ema na’in-haat (4) lakon vida, na’in-tolu hetan ona no na’in- ida seidauk hetan.

Vera Cruz-Villa Verde  ema na’in ida (1), Dom Aleixo -Comoro ho 30 Agostu, ema na’in haat (4) na’in tolu hetan ona no ida seidauk hetan, Don Aleixo-Malinamuk ema na’in-ida (1) ho Don Aleixo Comoro-Moris Foun ema na’in lima  (5), ho Dom Aleixo Aldeia Maneluana, Bee-duku ema na’in hitu (7), na’in neen hetan ona no na’in-ida seidauk hetan.

“To’o ohin kazu mate afeta hosi dezastre natural hanesan mota lori no rai hanehan hamutuk ema na’in 42 no balun sei buka tuir hela,’’ Sekretáriu Estadu SEPS, Joaquim Gusmão, hateten ba jornalista sira, iha edifísiu SEPS, Caicoli, Dili, kuarta ne’e.

Dadus hosi SEPS mós relata katak iha família uma-kain 2.375 ho totál ema 9.779 hosi munisípiu Dili  mak hela iha sentru evakuasaun hamutuk 18 iha kapitál Dili.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here