Reitór UNTL, João Soares Martins. Imajen Tatoli/Egas Cristóvão.

DILI, 08 abríl 2021 (TATOLI)—Operadór Telekomunikasaun Telkomcel hosi Indonézia oferese ona sim card ba estudante Universidade Nasionál Timor Lorosa’e (UNTL), hamutuk 4.000-resin atu bele asesu eskola online durante Estadu Emerjénsia.

Reitór UNTL, João  Soares Martins, hateten UNTL hetan apoiu hosi Telkomcel bazeia ba kooperasaun di’ak entre instituisaun rua, inklui mós opreradór telekomuniksaun rua seluk hanesan Timor Telecom no Telemor.

Notísia relevante:UNTL hala’o abertura tinan akadémiku 2021

“Mekanizmu atu hetan sim card hosi Telkomcel, kada estudante tenki rejistu ninia identidade iha lista operadór depois mak bele hetan tranferénsia pulsa ka pakote internete. Ida ne’e kontinua la’o hela bazeia ba akordu,” João  Soares Martins, hateten ba jornalista-sira iha Auditóriu Liceu UNTL, Díli, kinta ne’e.

Reitór ne’e husu ba estudante-sira ne’ebé fila ona ba Munisípiu atu nafatin utiliza fasilidade Telkomcel ne’ebé iha atu bele hetan apoiu pakote, nune’e bele akompaña matéria online ne’ebé sei hahú bainhira universidade anunsia inísiu aula.

Nune’e mós Vise-Reitór Asuntu Akadémiku no Garante Kualidade, Samuel Venâncio de Sousa Freitas, hateten babain Telekomcel fornese pakote internete kada fulan ba kada estudante.

Nune’e, estudante foun hamutuk 4.473 ne’ebé matrikula ona mak hetan ona, falta na’in 809 seidauk hetan tanba seidauk halo matrikulasaun foun.

“Signifika, lista estudante 4.000-resin iha ona Telekomcel,” Samuel Venâncio de Sousa Freitas subliña.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here