Primeiru-Ministru, Taur Matan Ruak. Imajen TATOLI/Egas Cristóvão

DILI, 08 abríl 2021 (TATOLI)-Primeiru-ministru Taur Matan Ruak rekoñese, bainhira simu tiha vasina AstraZeneca horiseik (07/04/2021) sente forte liu antes.

“Ha’u forte liu fali uluk bainhira simu tiha vasina AstraZeneca ne’e. Ha’u presiza sona tan dala ida para forte liután, karik vasina uluk karik agora aumenta forte liután”, PM Taur kompara perante jornalista sira bainhira halo enkontru ho PR Francisco Guterres Lú Olo, iha Prezidente Repúblika nia rezidénsia Faról Dili, ohin.

Primeiru-Ministru, Taur Matan Ruak, simu vasina kontra COVID-19 iha Sentru Saúde Bairro Formosa, kuarta (07/04). Imajen TATOLI/António Gonçalves

Liga ho vasina AstraZeneca, Xefe Governu ne’e hateten, presiza luta hamutuk hodi manan situasaun difísil bainhira lahamutuk mak sei la manan.

“Ha’u husu ita kontinua hamutuk labele fahe malu, labele aproveita situasaun hodi hatún ida no hasa’e ida, ne’e ha’u dehan ita sei la manan buat ida. Ha’u la manan, Avo Xanana, Prezidente Repúblika Francisco Guterres Lú Olo mós la manan no ita hotu sei la manan bainhira ita la hamutuk hodi luta”, nia dehan.

Notísia relevante:PM Taur simu ona vasina dahuluk

PM akresenta moras COVID-19 ne’e inimigu ida ne’ebé presiza ema hotu-hotu hamutuk hodi kombate nune’e lori nasaun ne’e ba oin no hakarak ema elojia povu Timor-Leste ne’e lutadór.

Ba afetadu COVID-19, nia hateten: “Imi sei la mesak tanba Governu sei halo buat ne’ebé Governu bele halo maibé la’ós milagre”.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here