Pedro Carrascalão

DILI, 08 abríl 2021 (TATOLI)Responsável ba ekipa Fly Timor, Pedro M. Carrascalão, hateten prontu obedese ba desizaun Governu ne’ebé deside suspende provizóriu movimentu aéreu mai Timor-Leste iha abríl nia-laran.

“Ha’u tenke kumpre tanba ne’e hanesan desizaun ha’u-nia Governu nian. Sira pasti iha razaun, agora hosi ha’u-nia parte mak tenke tenta nafatin responsabiliza pasajeiru sira ne’ebé selu ona billete hodi bele semo nafatin to’o sira-nia destinasaun ikus. Desizaun Governu ita labele kontra,” Responsável ba ekipa Fly Timór, informa ba Agência TATOLi via rede sosiál, kinta ne’e.

Notísia relevante: Komisaun Interministeriál deside suspende provizóriu movimentu aéreu mai Timor-Leste fulan-ne’e

Maski nune’e, Pedro Carrascalão husu ba Governu karik bele sira mantein nafatin aviaun Malindo semo mamuk mai Dili hodi foti pasajeiru sira ne’ebé hakarak sai ba rai-li’ur.

“Karik bele mai Timór mamuk mós laiha problema, tanba iha pasajeiru sira ne’ebé atu sai ba li’ur ne’e bele sai, tanba barak mak timor-oan sira ne’ebé hakarak buka moris iha rai-li’ur. Posizaun hau-nia mak hanoin fali pasajeiru ne’ebé iha connection flight no sira tenke halo teste COVID-19 ne’ebé la’ós baratu, teste dala-ida de’it iha Inglaterra tenke selu kuaze $300,” nia akresenta.

Maske nune’e, pasajeiru sira komprende no depende de’it ba sira ne’ebé charter aviaun.

“Hosi parte aviaun, sira komprende tanba ami mak charter aviaun, sira tuir de’it ami-nia hakarak. Pasajeiru ne’ebé atu mai Timór agora ne’e barak loos maibé sira ne’ebé selu billete ona kuaze ema na’in-100 no sira ne’ebé atu sai ba rai-li’ur mós iha na’in-103 ona tanba ha’u limita ba 106 de’it. Ida-ne’e impaktu tebes ba pasajeiru sira ne’ebé atu ba rai-li’ur,” Pedro hatutan.

Deside muda voo ba fulan-maiu

Ho desizaun Governu, Responsável ba ekipa Fly Timor deside muda voo aviaun ba fulan tuir mai.

“Deside muda loron flight ba fulan-maiu tanba ha’u-nia charter agreement ho Malindo ne’e to’o dala-neen, to’o fulan-juñu no bele estende tan konforme ha’u-nia hakarak. Antes ne’e ami planea aviaun semo dala-rua kada fulan hodi fó espasu semana rua entre kada voo, maibé agora iha abríl Governu la fó movimentu pasajeiru entaun maiu mak aviaun bele semo dala-tolu ka dala-haat,” nia subliña.

Notísia relevante: Pedro Carrascalão prontu fasilita espasu karga gratuita ba Governu

Responsável ba ekipa Fly Timor, Pedro M. Carrascalão, hanesan timor-oan ne’ebé mak serbisu iha área aéreu, deklara ona prontu fasilita espasu aviaun hodi tula karga gratuita ba Governu Timor-Leste tanba pesoalmente charter ona aviaun hosi Malindo Air.

Nia parte kompleta ona pagamentu ba Malázia iha loron 01 marsu liubá hodi semo mai Timór hosi Kuala Lumpur atu halo repatriasaun sidadaun timor-oan sira iha Brazíl, Inglaterra, Irlandia, Korea Súl, Indonézia, no Portugal.

Tuir planu, aviaun sei sai hosi Kuala Lumpur tuku 02:40 dadeer hosi Terminal 1 KLIA no to’o iha Aeroportu Internasionál Prezidente Nicolau Lobato, Dili, iha tuku 08:00 iha loron 16 abríl.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here