Pasajeiru Aviaun Citilink bainhira to’o iha Aeroportu Prezidente Nicolau Lobato, Comoro, Dili. Imajen Tatoli/António Gonçalves

DILI, 07 abríl 2021 (TATOLI)Governu liuhosi Komisaun Intermisteriál ba prevensaun COVID-19 deside suspende provizóriu movimentu aviaun ne’ebé tula pasajeiru sira hosi rai-li’ur mai Timor-Leste.

“Komisaun Interministeriál deside ona katak durante fulan-abríl laiha movimentu aviaun atu tula ema ka pasajeiru hosi estranjeiru mai ita-nia rai,” Ministru Transporte no Komunikasaun, José Agustinho da Silva, hateten ba Agência TATOLI, iha Sentru Saúde Formosa, Dili, kuarta ne’e.

Ezekutivu sira toma desizaun ne’e hafoin rona aprezentasaun no rekomendasaun hosi Sala Situasaun-Sentru Integradu Jestaun Krize (CIGC, sigla Portugés), ne’ebé rekomenda durante fulan-abríl movimentu ema mai hosi li’ur hapara provizóriu tanba fasilidade no akomodasaun ladún sufisiente atu atende hafoin dizastre naturál.

“Nu’udar membru Governu, ami tau atesaun ba parte ida-ne’e ho objetivu atu evita númeru ema mai hosi li’ur, tanba ita-nia kondisaun atu akomoda ema la sufisiente,” nia akresenta.

Maski Autoridade Aviasaun Sivíl Timor-Leste (AACTL, sigla portugés) simu ona pedidu autorizasaun ‘flight aproval’ hosi ajénsia viajen sira ne’ebé husu atubele tama Dili ba repatriasaun no voo umanitáriu.

“Pedidu hosi ajénsia viajen sira bele tama mai, hafoin ita haree ita-nia dinámiku ne’e no adapta ho desizasuan sira ne’ebé mak sai ona, ita tenke kumpre maibé hosi tempu ida ita bele avalia,” nia hatutan.

Tuir nia, pedidu sira ne’e konstrutivu tebes ho prinsípiu atu fasilita repatriasaun timor-oan sira hosi rai-li’ur mai rai-laran ou kontráriu.

“Agora hosi li’ur ita halo limitasaun, ba oin kuandu situasaun ne’e ita haree di’ak, ita bele fó oportunidade ba ita-nia sidadaun sira ne’ebé iha interese atu halo investimentu atu fasilita ita-nia ema sira,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here