Ambiente Klínika Bairru- Pité. Imajen/Facebook

DILI, 08 abríl 2021 (TATOLI)—Inundasaun ne’ebé akontese iha 3 to’o 4 abríl, estraga zelera malirin ne’ebé Governu oferese ba Klínika Bairru Pité (KBP), atu rai ai-moruk vasina COVID-19 ho tipu AstraZeneca, estraga mós kulxaun ne’ebé pesiente-sira uza hamutuk 17.

“Zelera ne’e mak at totál no ami informa ona ba parte Diresaun Vasinasaun iha Minsitériu Saúde atu bele haree no troka fali,’’ Jestór Klínika Bairru Pité (KBP), Inácio dos Santos, hateten ba jornalista Agência Tatoli, kinta ne’e.

Notísia relevante:Inundasaun estraga sasán komunidade, hamosu mós lixu

Nia konta tuir katak, bee ho volume boot, tama to’o sala maternidade, dentaria inklui sala nutrisaun maibé funsionáriu-sira hamoos ona no oras ne’e daudaun funsiona hikas hanesan baibain.

Buat ne’ebé KBP presija urjente maka, kulxaun ba pasiente-sira tanba iha kulxaun hamutuk 17 mak estragadu no oras tenke soe.

“kulxaun sira-ne’e baibain ita uza hodi halo atendimentu ba pasiente, maibé agora la to’o tanba ita soe 17,” nia subliña.

Maski la temi númeru detalla, maibé jerente ne’e informa mós katak, durante inundasaun parte Klínika haruka fila pasiente-sira ne’ebé baixa ho kategoria moras kamaan.

Nune’e, hahú iha 06 abríl Klínika ne’e hahú hikas ninia prosesu atendimentu ba pasiente hanesan baibain no pasiente besik atus ida mak mai konsulta.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here