Inundasaun ne'ebe akontese iha sesta (13/03/2020) iha Kapital Dili

DILI, 08 abríl 2021 (TATOLI)-Xefe Departamentu Saneamentu Munisípiu Dili, hateten, daudaun ne’e Kapitál Dili iha fati-fatin nakonu ho lixu tanba impaktu hosi dezastre naturál ne’ebé foin lalais akontese ne’e maibé sira kontinua esforsu-aan nafatin servisu nunue’e bele redúz lixu sira.

Xefe Departamentu Saneamentu Munisípiu Dili, Domingos Soriano. Imajen Tatoli/Osória Marques.

“Ami mós rekoñese katak loos duni lixu agora daudaun ne’e barak tebes butuk iha Kapitál Dili, tanba hanesan ita hotu hatene katak akontesimentu dezastre naturál ka inundasaun ne’ebé foin lalais akontese ita hotu la espera tanba afeta makaas ba ita-nia komunidade nia uma no estraga komunidade nia sasan barak tebes. Entaun hamosu lixu barak maibé ita nafatin halo esforsu nune’e bele redús lixu sira iha Dili laran,” Xefe Departamentu Saneamentu Munisípiu Dili, Domingos Soriano ba Agência TATOLI liuhosi telefone, kinta ne’e.

Lixu sira ne’ebé agora daudaun butuk iha fati-fatin ne’e, ezekutivu ne’e dehan, la hanesan uluk; bolu lixu uma-kain maibé, agora bolu lixu dezastre naturál tanba inundasaun ne’e estraga buat barak ikus sai lixu hotu.

“Tanba daudaun ne’e hahú hosi Becora to’o Comoro ita observa lixu uma-kain menus ona maibé lixu dezastre naturál mak makaas iha fati-fatin,” nia dehan.

Enkuantu, Xefe Departamentu Saneamentu Munisípiu Dili ne’e dehan, durante sira halo observasaun lixu kontinua barak tanba parte ida mak komunidade ne’ebé iha transpote privadu hakarak lori lixu ba fakar iha Tibar maibé serkka sanitária entaun abitante sira mós fakar de’it lixu ba lixeiru mamuk sira ne’ebé mak besik.

“Iha observasaun ne’e mós ita-nia maluk sira ne’ebé uza karreta privadu balun foti lixu hakarak atu lori ba lixeiru Tibar, maibé tanba ho situasaun serka sanitária labele sai entaun sira haree de’it fatin lixu ne’ebé livre fakar ba de’it. Entaun ho ida ne’e mak ita haree lixu aumenta ba beibeik no karreta saneamentu lori atu labele tiha de’it tanba hahú iha loron segunda to’o ohin, ami observa lixu ne’e barak nafatin,” nia hateten.

Nia afirma, karreta ne’ebé Governu kontratu ho kompañia lima hamutuk 49 no pesoál servisu sanemanetu hamutuk 194 la konta ho kondutór.

“Kareta ne’ebé Governu kontratu ba kompañia lima hamutuk 49, no daudaun ne’e hala’o hela servisu, sirkula iha Sidade Dili laran, ita haree loron ida sira tula dala tolu maibé fo’er sei butuk nafatin, tanba ami esforsu nafatin ita bele dehan serbisu to’o semana ida mak lixu bele menus,” nia konsidera.

Xefe Departamentu Saneamentu Munisípiu Dili informa katak kompañia lima ne’ebé Governu kontrata hodi rekolla lixu loroloron mak, iha Postu Administrativu kompañia Abolala karreta hamutuk hitu, Postu Administrativu Na’in-Feto kompñia Labelay karreta sanulu, Vera-Cruz kompañia Jaklilo karreta sia no Don Aleixo Lot A kompañia Lori Solison karreta 11, Lot B Felitra karreta 12. Lixu sira ne’ebé karreta sira rekolla loron ida dala tolu ne’e lori ba tau iha lixeiru Tibar.

Tuir ezekutivu ne’e katak, observasaun ne’ebé sira halo loron hirak ne’e haree katak lixu sira ne’ebé namkari iha Dili laran ne’e hanesan baibain karik karreta saneamentu 49 ne’e bele rekolla hotu lixu sira ne’e maibé ho situasaun inundasaun ne’e sira sente katak todan.

“Ami senti katak todan tebes tanba lixu agora barak tebes foti mós la hotu ne’ebé ami presiza tan karreta balu, atu apoiu ami para bele redús lalais lixu sira ne’e tanba ami mesak, ami sei halo esforsu másimu maibé lixu atu redús lalais ne’e kle’ur tanba lixu barak liu,” nia konsidera.

Maibé, nia dehan, ohin Ministrériu Administrasaun Estatál (MAE) dehan ona sei kontratu tan karreta balu hosi kompañia mai atu apoiu karreta saneamentu nian atu bele redús lixu sira iha Dili laran.

“Tuir informasaun ne’ebé ha’u rona katak aban ka bain rua MAE sei kontratu tan karreta 20 hosi kompañia PAX,” nia hateten.

Notísia relevante:Inundasaun estraga eskola 14 iha Dili, Baucau ida no Liquiça ida

Jornalista : Arminda Fonseca 

Editór : Cancio Ximenes

HAKEREK NO HATÁN

Please enter your comment!
Please enter your name here