Edifísiu eskola Ensino Básico Central (EBC), Osahuna Baguia, Munisípiu Baucau ne’ebé anin sobu. Imajen/SEMB.

DILI, 6 abríl 2021 (TATOLI)—Dadus provizóriu ne’ebé Agência Tatoli hetan hosi terrenu hatudu katak, iha edifísiu eskola hamutuk 16 mak afeitadu hosi inundasaun ne’ebé akontese iha 3-4 abríl, kompostu hosi Munisípiu Dili eskola 14, Baucau ida no Liquiça ida.

Totál eskola 16 ne’e, iha edifísiu eskola Ensino Basico hamutuk sia  no eskola Ensino Secundário hamutuk hitu, ne’ebé balun anin loke kalén, balun tahu mak hakoi, no balun bee nalihun to’o oras ne’e.

Notísia relevante:Inundasaun estraga ekipamentu COVID-19 iha SAMES, ai-moruk aseguradu

Diretór Serbisu Edukasaun Munisípiu Dili (SEMD), Duarte Bragança, informa totál dadus provizóriu ne’ebé rekolla hosi dirijente eskola-sira, iha área Munisípiu ne’e mak hanesan, eskola Ensino Secundario Geral (ESG) 5 de maio, eskola Ensino Secundario Tecnico Vocacional (ESTV) Becora, ESTV 28 novembro Becora, ESG 4 setembru UNAMET Balide, ESG Finantil, ESG 10 dezembro Comoro, EBC Sérgio Viera de Melo (SVDM) Becora, EBC Bidau Akadiru-hun, EBC Manleuana, EBF Casnaba, EBF Fatuhada, EBF Beduku no EBF Fatumeta.

“Ita hetan mós informasaun katak, hosi eskola ne’ebé afetadu ne’e iha eskola haat mak kondisaun estragus. Tanba moru eskola monu, hanesan ESTC Becora, EBC Sérgio Viera de Melo Becora, EBC Manleuana, EBF Casnaba no EBC Fatumeta. Eskola sia seluk ninia kondisaun bee mak nakonu hosi arredór to’o sala-de-aula,” Duarte Bragança  hateten ba jornalista-sira iha edifísiu MEJD Vila Verde, tersa ne’e.

Nune’e mós Diretór Serbisu Edukasaun Munisípiu Likisa, Zito António via telefónika, hateten hosi parte munisípiu ne’e edifísiu eskola ida de’it mak hetan estragus, hanesan eskola Ensino Basico Filial (EBF) Tibar.

“Bee mak tama to’o eskola laran no estraga hotu dokumentu eskola inklui estudante-sira nian,” Zito António hateten.

Maski nune’e, parte eskola orienta ona profesór no estudante-sira hodi hamoos, maibé seidauk garante másimu tanba estudante-sira mesak labarik de’it hosi síklu 1,2.

Hosi sorin seluk, Diretór Serbisu Edukasaun Munisípiu Baucau, Felix Ximenes mós informa ba Agência Tatoli katak, iha edifísiu eskola Ensino Basico Central (EBC) Osahuna Baguia Munisípiu Baucau ho sala-de-aula tolu  mak hetan estragus.

Diretór ne’e via telefónika relata, edifísiu eskola ne’e naksobu hotu no estudante 107 sei labele hala’o prosesu ensinu aprendizazen iha tempu besik.

“Posibilidade 11 abríl ba oin prosesu aprendizazen iha Baucau sei hahú hikas, maibé agora sala- de-aula tolu mak kalén anin sobu nakloke hotu. Nune’e, estudante-sira seidauk bele hala’o prosesu aprendizazen hanesan baibain, tanba sala-de-aula neen de’it mak funsiona,” nia esplika.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here