DILI, 08 abril 2021 (TATOLI)—Administradór Munisípiu Aileu, Abel da Conceição, informa udan boot ne’ebé foin lalais akontese iha sabadu-domingu (3-4/4) semana kotuk, hamosu dezastre naturál ne’ebé rezulta joven mane ida lakon vida to’o agora buka seidauk hetan no uma 45 mak estraga totál.
Notísia Relevante: Dezastre naturál, ema lakon vida aumenta ba na’in-42
“Udan boot ne’ebé foin lalais akontese iha sabadu kalan no domingu madrugada semana kotuk hamosu dezastre naturál hanesan rai monu, uma hetan estragus, no rezulta joven mane ida ho idade 16 mate to’o agora buka seidauk hetan. Dadus provizóriu ba komunidade nia uma ne’ebé estraga totál ne’e hamutuk 45, no uma ne’ebé hanesan anin sobu bosok, ai-riin tohar halo uma tara aan de’it ne’e hamutuk 26,” Abel da Conceição informa ba Agência TATOLI, liuhosi telefónika, kinta ne’e.
Nia haktuir, kronolójia joven ne’ebé mate ne’e hosi Suku Tohumeta, Postu Administrativu Laulara nian, nia halo viajen ba toba iha família sira iha Aldeia Hermige, Suku Fatisi, Postu Administrativu Laulara, nia uma mak kalan toba rai monu ba hanehan de’it kuartu ne’ebé nia toba ne’e hodi rezulta nia mate, maibé to’o horisehik mate isin buka seidauk hetan.
Aleinde ne’e, nia informa, vítima sira-ne’ebé uma hetan estragus totál ne’e, daudaun ne’e sira balun hela iha família nia uma no balun hela provizóriu iha viziñu sira-nia uma, maibé difikuldade ne’ebé sira hasoru mak falta ai-han.
“Difikuldade ne’ebé ita hosaru ne’e mak falta ai-han. Tanba, Governu liu hosi Ministériu Solidaridade Sosiál no Inkluzaun (MSSI), iha hela apoiu umanitáriu ne’ebé atu lori mai fó ba ita-nia Komunidade ne’ebé afeta ba dezastre naturál ne’e maibé dalan ne’ebé liga hosi Dili mai Aileu kotu hotu, entaun daudaun ne’e vítima sira komunidade ho komunidade mak agora ajuda malu hela,” nia haktuir.
Tanba ne’e, nia dehan, la’ós Autoridade Munisipál la book aan atu halo servisu maibé daudaun ne’e ekipa administrasaun munisípál sei iha hela faze rekolla no levantamentu dadus, entaun bainhira rekolla hotu ona dadus mak sei informa ba Governu Sentrál mak foin haree no tetu.
“Aagora ita sei iha hela faze rekolla dadus no provizóriu sira-ne’e ita manda tutuir ba Governu Sentrál mak foin deside atu apoiu sasán konstrusaun uma nian ba vítima sira ka halo nusá ne’e, hafoin rekolla hotu dadus mak mak ita haree. Tanba daudaun ne’e ita iha hela levantamentu dadus. Maibé tanba liña komunikasaun Timor Telecom nian falla hela, entaun dadus sira-ne’e mós ita seidauk haruka ba Governu Sentrál,” nia hateten.
Nia informa, aleinde komunidade nia uma hetan estragus totál, iha mós mota lori komunidade-nia animál hanesan karau hamutuk 24 no natar ne’ebé bee tama estraga haré ne’e seidauk hatene ektare hira, maibé pontu 11 mak hetan estraga.
Iha dezastre naturál ne’e, nia hateten, estraga mós estrada liga Aileu ba Dili no estrada foun no tuan sira-ne’e kotu total. Nune’e mós, estrada ne’ebé liga Ponte Remexio ba Lequidoe mós kotu total, entaun daudaun ne’e transporte hanesan motor no karreta labele asesu.
Jornalista: Arminda Fonseca
Editór: Cancio Ximenes
