Arguidu António da Conceição “Kalohan”, marka prezensa iha TDD, kinta (08/04/2021). Imajen Tatoli/Nelson de Sousa.

DILI, 08 abríl 2021 (TATOLI)-Membru Parlamentu Nasionál hosi Bankada Partidu Demokrátiku (PD), António da Conceição ‘’Kalohan’’,  kinta (08/04/2021), tuku 9:00  Otl, marka ona prezensa iha Tribunál Distritál Dili (TDD) hodi partisipa iha audiénsia julgamentu nu’udar arguidu ba kazu balun ne’ebé deskonfia nia envolve durante asume kargu hanesan Ministru Komérsiu, Indústria no Ambiente (MCIA) iha tinan 2014.

Notísia Relevante : PN hasai ona imunidade ba Deputadu António da Conceição

António “Kalohan” nia prezensa iha TDD akompaña mós hosi nia kompañeru sira hosi Partidu Demokrátiku, inklui mós membru Bankada PD iha PN hanesan Deputada  Elbina de Sousa Carvalho.

António “Kalohan” nia kampanáriu sira ne’e hatais kamiza mutin ne’ebé iha oin iha imajen António “Kalohan” nian no hakerek ho letra “Hamihis buat aat no haboot buat ne’ebé di’ak ‘’Kalohan’’. Iha fali kamiza nia kotuk hakerek “Amigos “Kalohan’’.

Tuir observasaun Agência Tatoli nian, daudaun iha TDD audiénsia seidauk hahú hodi hein hela juis prosesu sira.

Tuir informasaun ne’ebé Agência Tatoli asesu hosi MP prosesu ne’e rejista ho númeru NUC 0075/17PGGCC, MP deduz akuzasaun ho husu julgamentu iha intervensaun Tribunál koletivu, tuir artigu 236 no 14 hosi kódigu prosesu penál (KPP) hodi notifika arguidu/a na’in-lima (5) ho inisiál ADC, JIB, GPSC nu’udar kargu xefia iha Ministériu Komérsiu Indústria no Ambiente (MCIA), PMCSV nu’udar diretór hosi kompañia privada  ida no arguidu Antonio “Kalohan” nu’udar  eis-Ministru MCIA.

Faktu ne’ebé arrola hosi Ministériu Publiku (MP)  katak iha tinan 2014, MCIA iha osan atu sosa ekipamentu diversu hosi orsamentu kapitál menór ho montante global $200,000.00. Hafoin ne’e, MCIA loke konkursu públiku kompañia Kninuk Star Unipessoal Lda, sai vensedór hodi asina kontratu ho MCIA ho montante global $191,000.00, ne’ebé ikus mai Tezouru Ministériu Finansas halo pagamentu ho montante refere ba kompañia, maske iha realidade ekipamentu laboratóriu indústria sira refere, kompañia foin fornese mai iha MCIA, iha fevereiru 2015, fulan-rua depois halo tiha pagamentu, maske nune’e, ekipamentu sira kompañia hatama la kompletu to’o novembru 2015, hodi prejudika ekipamentu sira balun labele funsiona, no la utiliza to’o agora, hodi hamosu prejuizu ba Estadu Timor-Leste ho valor $143,500.00.

MP akuza arguidu/a sira ho krime pekulatu ne‘ebé previstu no punidu hosi art. 295 n° 1, krime partisipasaun ekonomia iha negósiu no administrasaun danoza, ne’ebé previstu no punidu hosi art. 299 n°. 2, no art. 274 n°. 2, krime burla agravadu, falsifikasaun dokumentu, ne’ebé previstu no punidu hosi art. 266 no 267 n°. 1, art. 274 n° 2 no art. 303, hotu-hotu hosi kódigu penál Timor-Leste.

Parlamentu Nasionál (PN), iha loron 22 marsu 2021, hasai ona imunidade ba Deputadu António da Conceição ‘Kalohan’ hodi ba hatán iha Tribunál Distritál Dili (TDD) nu’udar arguidu iha loron 8 abríl tinan ida-ne’e.

Rezolusaun númeru 45/2109 kona-ba levantamentu imunidade ba Deputadu António da Conceição nian hasai iha 15 outubru 2019 hodi ba hatán iha tribunal iha loron 2 dezembru 2019 liubá maibé la konsege halo julgamentu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here