Plenária Parlamento Nasionál. Imajen TATOLI/Egas Cristovão.

DILI, 22 marsu 2021 (TATOLI)—Parlamentu Nasionál hasai ona (levantamentu) imunidade ba Deputadu António da Conceição ‘Kalohan’ hodi ba hatán iha Tribunál Distritál Dili (TDD) nu’udar arguidu iha loron 8 abríl tinan ida-ne’e.

Notísia Relevante: PN sei hasai imunidade ba Deputadu António da Conceição  

Prezidente Parlamentu Nasionál haktuir, rezolusaun númeru 45/2109 kona-ba levantamentu imunidade ba Deputadu António da Conceição nian hasai iha 15 outubru 2019 hodi ba hatán iha tribunal iha loron 2 dezembru 2019 liubá maibé la konsege halo julgamentu.

Tanba ne’e, Prezidente Parlamentu informa ba deputadu sira atu halo de’it votu konfirmasaun hodi Deputadu António da Conceição ba hatán iha tribunál.

Iha rezultadu votasaun ba levantamentu imunidade Deputadu António da Conceição ne’e, a-favór 57, kontra abstensaun 4 no branku 1. 

“Nune’e Parlamentu Nasionál konfirma desizaun anteriór kona-ba suspensaun funsaun señor Deputadu António da Conceição atu bele tuir julgamentu iha loron 8 fulan-abríl ne’ebé tribunal,” Prezidente Parlamentu Nasioál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, segunda ne’e.

Entretantu, Deputadu António da Conceição, husu pontu de ordem hodi fó agradesimentu ba Prezidente Parlamentu Nasionál tanba hola duni responsabilidade polítika uma fukun nian.

“Ha’u mós hakarak agradese ba deputadu sira hotu nia apoiu ba vota a-favór ne’e tanba ita boot sira-nia autorizasaun maka ita bele enkurta prosesu,” Deputadu Kalohan agradese ba deputadu sira.

Iha biban hanesan, Deputadu Mariano Assanami Sabino, hateten Partidu Demokrátiku iha responsabilidade boot iha governasaun ne’ebé PD hola-parte to’o iha tribunál.

“Ha’u hein katak iha rai-lulik ida-ne’e sira seluk ne’e la sala, hosi kedas iha krize 2006, projetu lubuk ida-ne’ebé la la’o ne’e laiha ema ida ke sala,” Prezidente PD ne’e akresenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here