Inundasaun iha área BTM Fatuhada, domingu (04/04). Imajen TATOLI/Natalino Costa

DILI, 07 abríl 2021 (TATOLI)–Xefe suku Fatuhada, Marcelo Soares, hateten nia parte ho ekipa hahú ona halo levantamentu dadus vítima afetadu inundasaun iha domingu ne’e.

“Ha’u orienta ona Xefe aldeia ida-idak no delegadu atu hahú halo levantamentu dadus ba komunidade sira ne’ebé maka  afeta ba inundasaun foin lalais ne’e tanba halo abitante balun la salva sira-nia sasán to’o bee hoban hotu sasán no lori hotu,” líder komunitáriu ne’e informa ba Agência TATOLI via telefónika, kuarta ne’e.

Notísia relevante: Inundasaun, komunidade BTM Fatuhada triste la konsege salva sasán

To’o oras ne’e seidauk iha númeru serteza komunidade ne’ebé  afeta ba dizastre naturál ne’e tanba foin mak hahú levantamentu.

“Ami ohin fó ona formuláriu ba sira atu enxe no iha formuláriu ne’e iha formatu hateten loloos  katak haruka hakerek hotu sasán hirak iha uma laran mak a’at liga ho inundasaun foin daudaun,” nia akresenta.

Autoridade suku Fatuhada ne’e dehan, formuláriu ne’e sira-nia parte sei enkamiña ba ministériu kompetente atu fó apoiu balun.

“Ita hotu hatene inundasaun foin lalais ne’e boot, halo povu balun lakon nia vida no sasán uma laran, tanba ne’e ha’u hanoin Governu presiza fó apoiu,” nia hatutan.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here