Inundasaun iha área BTM Fatuhada, domingu (04/04). Imajen TATOLI/Natalino Costa

DILI, 04 abríl 2021 (TATOLI)—Udan ho intensidade boot hahú madrugada tuku 02:00 to’o meiu dia, domingu ne’e, provoka inundasaun kuaze iha fatin hotu iha kapitál Dili no konsege estraga infraestrutura públika no privada, inklui komunidade sira-nia sasán.

Abitante BTM Fatuhada, Leonardo Letto, triste tanba udan boot no bee sae lalais halo labele salva sasán.

“Bee sa’e nakonu halo televizaun, jelera no sasán uma laran a’at hotu, triste tanba atu haloot mós la biban tan bee sa’e maka’as halo sasán a’at hotu. Espera bee labele sa’e liután,” nia dehan ba Agência TATOLI, iha BTM Fatuhada, domingu ne’e.

Iha fatin hanesan, abitantante iha área hanesan, Pedro Sousa, preokupa tanba bainhira iha udan ho intensidade maka’as liután bele fó risku ba komunidade.

“Ami preokupa ba oan sira, tanba udan halo situasaun araska tebes, labele tein tanba fatin bee tama hotu halo atu book an ladi’ak,” nia dehan.

Aleinde ne’e, ahi konsege mate iha oras barak nia laran no bee nalihun iha fatin-fatin tanba udan ho intensidade boot.

Iha fatin seluk iha kapitál Dili, Agência TATOLI nota mós katak abitante sira muda sai hosi uma ba fatin seluk hodi asegura-an no família iha edifísiu protesaun sivíl, Crus Vermelha de Timor-Leste (CVTL), Liceu Universidade  Nacional Timor Lorosa’e (UNTL), edifísiu Ministériu Finansa, Dom Bosco, Infordepe Vila-verde no fatin seluk tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here