Polísia Nasionál Timor Leste (PNTL) hosi Bataliaun Orden Publiku (BOP) haruka fila abitante ne'ebé hakarak sai hosi Dili ba Munisípiu-sira parte loromonu, iha pontu entrada Tasi-tolu, tanba laiha órden hosi SS-CIGC, sesta (02/04/21). Imajen Tatoli/António Gonçalves.

DILI, 07 abríl 2021 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, husu ba universitáriu-sira iha Dili ne’ebé iha ona idaidak-nia Munisípiu atu koopera ho Sentru Saúde-sira hodi bele hetan teste swab.

Ha’u apela ba ita-nia alin estudante-sira ne’ebé fila ona ba Munisípiu, maibé seidauk hetan teste swab, tenke hakbesik an ba Sentru Saúde-sira atu bele halo teste,” Longuinhos hateten ba jornalista  Agência Tatoli iha Sentru Saúde Formoza (SSF), kuarta ne’e.

Notísia relevante:MESSK garante sei apoia universitáriu-sira durante Estadu Emerjénsia

Nia husu ba estudante ida-idak atu ho konxiénsia no matenek, tenki konsidera asuntu ne’e hanesan parte ida hodi ajuda komunidade, hases an hosi moras ida ne’e.

Ministru ne’e klarifika katak, Governu laiha intensaun atu bandu universitáriu-sira fila ba ida-idak nia Munisípiu, maibé importante mak tenke kumpre protokólu Organizsaun Mundiál Saúde (OMS)-nian.

Kona-bá kestaun ne’e, MESSK konvoka ona reuniaun ho reitór Universidade-sira iha Dili, atu bele rejista kada universitáriu ne’ebé hakarak fila ba Munisípiu, hodi bele hetan teste swab molok dezlokasaun.

Entretantu, ohin Administradór Postu Administrativu Railaco, Munisípiu Ermera, Arlindo dos Santos, informa katak, iha semana kotuk hahú hosi 02-04 abríl, Ermera-oan ne’ebé hela iha Dili halo viajen ilegál ba Ermera hamutuk ema na’in 700-resin.

Maski la temi universitáriu na’in hira, maibé Arlindo dos Santos dehan, hosi ema na’in-700-resin ne’e, oras ne’e daudaun balun iha fatin kuarentena Gleno no balun halo hela auto-kuarentena hodi hein rezultadu teste swab hosi Laboratóriu Nasionál Saúde (LNS).

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here