Ministru Ensinu Superiór Siénsia no Kultura, Longuinhos dos Santos. Imajen TATOLI/Egas Cristóvão.

DILI, 07 abríl 2021 (TATOLI)—Ministru Ensinu Superiór Siénsia no Kultura (MESSK) Longuinhos dos Santos, garante katak, sei mantein fó apoiu ba universitáriu-sira, hanesan fornese liña internete no insensaun propinas, bainhira Orsamentu Retifikativu (OR) hetan aprovasaun hosi Parlamentu Nasionál (PN).

Maski Governante ne’e la temi totál orsamentu ne’ebé parte MESSK propoin, maibé  nia garante katak, universtáriu-sira sei hetan duni atu bele fasilita sira-nia prosesu aprendizazen durante periúdu Estadu Emerjénsia.

Notísia relevante:PN deside Orsamentu Retifikativu debate ho karáter urjénsia

“Ha’u seidauk bele temi montante hira mak ita prevee iha OR, maibé ha’u sei fó-sai valór bainhira hetan ona aprovasaun iha PN,” Longuinhos hateten ba jornalista-sira hafoin simu vasina AstraZeneca iha Sentru Saúde Formoza (SSF), kuarta ne’e.

Tuir planu, MESSK sei oferese internete ba estudante-sira liu hosi subsídiu kada estudante $10 durante fulan tolu.

MESSK mós sei mantein fó apoiu insensaun propinas ba universitáriu-sira ne’ebé rejistu ona iha idaidak ninia universidade.

“Sira sei livre ba propinas no MESSK sei oferese kada estudante ho valor $150 kada semestre. Insensaun propinas ne’e sei kontinua tuir estensaun Estadu Emerjénsia,” Governante ne’e subliña.

Entrentantu, VIII Governu Konstitusionál lideradu hosi Primeiru Ministru (PM), Taur Matan Ruak, aprezenta proposta Orsamentu Retifikativu (OR) ho montante millaun $223 ba Parlamentu Nasionál ho karáter urjénsia.

Hosi montante orsamentu millaun $223 ne’e foti hosi Fundu Infraestrutura millaun $60 no resta halo de’it ajustamentu ba orsamentu 2021, ne’ebé aprovadu no promulgadu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here