Administradór Postu Administrativu Railaco, Munisípiu Ermera, Arlindo dos Santos. Imajen/Espesiál.

DILI, 07 abril 2021 (TATOLI)—Administradór Postu Administrativu Railaco, Munisípiu Ermera, Arlindo dos Santos, infroma iha semana kotuk hosi sesta (02/04) to’o domingu (04/04) ne’e, abitante sira liuliu Ermera-oan sira-ne’ebé hela iha Dili halo viajen ilegál hosi Dili ba Ermera ne’e hamutuk ema 700-resin no daudaun ne’e sei kontinua la’o nafatin.

Notísia Relevante: Administradór husu Governu taka provizóriu atividade eskolár iha Railaco

“Totál ema-ne’ebé halo viajen illegál hosi Dili mai Ermera, ne’ebé relata hosi Diretór Saúde Munisípiu Ermera katak hahú hosi sesta (02/04) to’o mai domingu foin lalais ne’e, ema hamutuk na’in-700 resin mak halo viajen ilegal tama Ermera, maibé seidauk konta horisehik no ohin nian,” Arlindo dos Santos informa ba Agência TATOLI, liuhosi telefónika, kuarta ne’e.

Administradór ne’e hatutan, hosi ema na’in-700-resin ne’e, daudaun ne’e balun iha fatin kuarentena Gleno nian no balun halo hela auto-kuarentena hodi hein rezultadu teste swab hosi Laboratóriu Nasionál Saúde nian.

Haree ba ema sei kontinua nafatin halo viajen ilegál hosi Dili ba Ermera, nia dehan, halo ona enkontru ho lideransa komunitáriu sira, para oinsá abitante sira-ne’ebé halo viajen ilegál ba Ermera ba liu uma lideransa komunitáriu sira-nian tenke informa ba parte saúde halo teste swab ba sira.

“Polítika ne’ebé ita halo atu evita moras ne’e mak ita halo enkontru lideransa komunitáriu sira katak karik ita nia komunidade liuliu estudante sira ne’ebé halo viajen mai tenke fó hatene ba parte saúde halo teste swab ba sira, tanba ne’e dala barak sira mai ba liu uma la hanoin katak moras ne’e perigu ba ita-nia vida,” nia dehan.

Tanba ne’e, nia husu ba Ermera-oan sira-ne’ebé daudaun ne’e sei kontinua halo viajen ilegál hosi Dili ba Ermera tenke uza konxiénsia ba entrega aan iha parte saúde hodi halo teste swab.

“Ha’u husu ba Ermera-oan hotu, liuliu Postu Administrativu Railaco nia oan sira, bainhira halo ona viajen illegal hosi Dili mai Ermera karik, uza ita-boot sira-nia konxiénsia mai entrega aan ba iha parte seguransa no saúde vijilánsia COVID-19 nian hodi halo teste swab, tanba ita boot sira mai hosi fatin afetadu ba COVID-19. Tanba, daudaun ne’e ita mós rejistu ona pasiente ida mak mate ba COVID-19,” Arlindo dos Santos apela.

Ba komunidade ne’ebé kontinua halo viajen ilegál hosi Dili ba Ermera tenke halo teste swab no halo auto-kuarentena iha ida-idak nia uma durante loron tolu hodi hein rezultadu hosi laboratóriu nasionál.

“Tanba rezultadu ne’e sei fó sai iha laboratóriu nasionál, ne’ebé di’akliu ita asegura hamutuk hodi prevene moras COVID-19 ne’e labele da’et tan ba ita-nia komunidade ne’ebé hela antes iha foho,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here