Administradór Postu Administrativu Railaco, Munisípiu Ermera, Arlindo dos Santos. Imajen/Espesiál.

DILI, 10 marsu 2021 (TATOLI)—Administradór Postu Administrativu Railaco, Munisípiu Ermera, Arlindo dos Santos, husu Governu liuhosi Ministériu Edukasaun Juventude no Desportu (MEJD) atu taka provizóriu atividade eskolár iha Railaco.

Nia hatutan, objetivu husu MEJD taka provizóriu atividade eskola Railaco nian tanba estudante ne’ebé eskola iha Railaco la’os ema Railaco oan de’it maibé estudante barak mak hosi Tibar ba eskola hotu iha Postu Administrativu Railaco.

“Situasaun iha Postu Administrativu kontroladu. Maibé, ami-nia preokupasaun ida mak Ministériu Edukasaun foti desizaun taka eskola hotu iha sidade Dili durante serka sanitária, entaun karik bele atividade eskolár iha Postu Administrativu Railaco mós taka provizóriu tanba besik los munisípiu Dili. Liuliu, estudante barak mak hosi Tibar mai eskola hotu iha Railaco, ida ne’e ameasa ida mós mai ami,” Administradór Postu Administrativu Railaco, Arlindo dos Santos, hateten ba Agência TATOLI liuhosi telefónika, kuarta ne’e.

Nia dehan, maske koordena ona ho Diretór eskola sira iha Railaco maibé desizasaun atu loke ka taka eskola ne’e mai hosi MEJD, entaun Ministériu Edukasaun tenke haree situsaun sira-ne’e, tanba maske daudaun ne’e estudante sira kumpre nafatin regra hosi protokolu saúde nian maibé virus ne’e mai ema la haree ida.

“Ministériu Edukasaun tenke haree situasaun sira-ne’e tanba agora Dili iha ona trasmiasaun lokál no komunidade Tibar ho Dili sempre halo movimentu ba-mai. Ita la hatene antes ne’e keta komunidade hosi Tibar mós ba Dili kontaku fíziku ruma ho família sira iha Dili ita la hatene. Ne’ebé, dalan di’ak mak prevene antes duké kura,” Administradór Railaco Arlindo dos Santos hateten.

Nia hateten, Kona-ba situasaun movimentu ema no trasporte iha Postu Administrativu Railaco nian kontroladu, tanba komunidade iha ne’ebá ne’e sira halo viajen lokál de’it.

“Tanba agora iha Railaco mós ita-nia Polísia sira halo postu seguransa nian iha fatin tolu hanesan, Entrada boot Mota hare, baliza Ermera ho Aileu no ida hosi baliza Liquisa Matata mai Railaco,” nia hatutan.

Nia dehan, objetivu monta postu segransa nian iha fatin tolu ne’e, atu garante katak sirkulasaun komunidade hosi Dili labele sa’e ba Munisípiu Ermera.

Nia argumenta, loron tolu ona Dili aplika serka sanitária komunidade hosi munisípiu Ermera liuliu Postu Administrativu Railaco nian daudaun ne’e seidauk iha komunidade ruma halo movimentu ilegál hanesan la’o ain ba Railaco ka Ermera.

“Karik iha komunidade ilegál ruma iha ita koordena ona ho autoridade lokál liuliu lideransa komunitáriu hanesan Xefe Suku no Xefe Aldeia, bainhira kaer komunidade ruma halo viajén ilegál tenke koordena ho pesoál saúde nune’e bele halo teste swab ba sira ne’ebé la’o no tama ilegál,” Adminstradór Arlindo hateten.

Jornalista: Arminda Fonseca 

Editór : Cancio Ximenes  

HAKEREK NO HATÁN

Please enter your comment!
Please enter your name here