Primeiru-Ministru, Taur Matan Ruak, bainhira halo observasaun ba fatin estragu dezastre naturál iha kapitál Dili, tersa (06/04) Imajen TATOLI/Egas Cristóvão

DILI, 06 abríl 2021 (TATOLI)—Primeiru-Ministru (PM), Taur Matan Ruak, hateten nia parte prontu simu vasina dahuluk atu fó garantia ba sidadaun katak seguru ba prevensaun COVID-19.

“Vasina horisehik to’o ona no aban sei vasina. Tanba ne’e, ha’u mak oferese ha’u-nia an hanesan ema dahuluk simu vasina atu hatudu ba inan-aman sira no sidadaun hotu katak vasina ne’e seguru no di’ak,” PM Taur hateten iha Ponte Bekusi, Becora, tersa ne’e.

Fundu Nasaun Unida ba infánsia (UNICEF) liuhosi COVAX fasicility transporta ona ai-moruk COVID-19 ho tipu AtraZeneca doses 24.000 mai Timor-Leste ho aviaun MY Indo Airlines.

Notísia relevante: AstraZeneca doses 24.000 to’o ona TL

Nune’e, Xefe Governu parabeniza komisaun interministeriál ne’ebé trata planu vasinasaun nasionál ne’ebé lidera hosi Vise Primeiru-Ministru no Ministra Solidaridade Sosiál no Inkluzasan, Armanda Berta dos Santos, ho ekipa ne’ebé servisu maka’as hodi vasina ne’e to’o iha Timor-Leste.

“Vasina foin mak to’o doses 24.000, ne’ebé ema ida simu dala-rua, entaun ema ne’ebé simu vasina faze dahuluk hamutuk 12.000 de’it tanba populasaun Timor-Leste agora millaun 1,5, signifka ita presiza doses millaun 3,” Xefe Governu akresenta.

Biban ne’e, PM Taur enkoraja sidadaun hotu atu simu vasina ne’e tanba atu evita mate tanba COVID-19.

“Ita hakarak mate tanba distinu la’ós mate tanba COVID-19 no mós labele afetadu todan no hetan karik ita bele reziste,” nia subliña.

VIII Governu konsitutsionál planu atu  tinan ne’e nia rohan sidadaun hotu bele simu vasina atubele la’o livre.

“Ita-nia planu mak halo buat hotu atu to’o dezembru tinan ida-ne’e, Timór laran tomak bele hetan vasina tanba tinan oin ita iha Festa Demokrasia hodi hili ita-nia Prezidente Repúblika foun, entaun ita hakarak inan-aman sira la’o normál no lalika halo tan hanesan agora ita subar oin. Tanba ne’e ita serbisu maka’as atu vasina to’o lalais,” nia tenik.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here