Atividade iha sala plenária Parlamentu Nasionál. Imajen TATOLI/António Gonçalves.

DILI, 06 abríl 2021 (TATOLI)—Parlamentu Nasionál (PN), tersa ne’e, aprova proposta-alterasaun ba Orsamentu Retifikativu (OR) debate ho karáter urjénsia hodi halo retifikasaun ba Lei Orsamentu Jerál Estadu (OJE) 2021.

Governu aprezenta proposta-alterasaun ne’e atu foti millaun $223,8 hosi OJE 2021, nune’e bele prevee ba fundu COVID-19.

Notísia Relevante: Governu aprezenta Orsamentu Retifikativu millaun $223 ba PN

Pedidu prioridade no urjénsia ba proposta-lei númeru 32/V(3a)-primeira alterasaun lei númeru 14/2020, 29 dezembru, kona-ba Orsamentu Jerál Estadu 2021 nian aprovada ho rezultadu votasaun a-favór 39, kontra 0 no abstensaun 14.

“Ho rezultadu votasaun ida-ne’e entaun pedidu urjénsia ba Orsamentu Retifikativu aprovadu, tuir mai ita la’o-tuir karáter urjénsia ne’ebé ohin ita aprova ona no sei refleta ho kalendáriu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Entretantu, Prezidente Komisaun C (Finanasa Públika), Deputada Maria Angélica Rangel, esplika proposta-lei ne’e hodi altera lei OJE 2021 tanba OJE 2021 prevee de’it millaun $31 entaun la sufisiénsia.

Nia argumenta, proposta-lei ne’e refere ho prosesu tramitasaun urjénsia ho títulu simples no objetu rua mak hanesan prosede primeira-alterasaun ba OJE 2021 aprovadu hosi lei númeru 14/2020, 29 dezembru, no aprova mós medida hodi halo mitigasaun impaktu sósiu-ekonómika durante vijénsia pandemia COVID-19.

“Proposta orsamentu retifikativu ne’e hodi halo alterasaun Lei OJE 2021 ne’ebé ami aprova ona ne’e, artigu balun seidauk, iha lei ne’e tenke halo alterasaun hodi hatama tán ba Lei OJE 2021 ne’e,” Prezidente Komisaun C fundamenta.

Governu justifika pedidu ho karáter urjénsia hodi halo retifikasaun ba Lei OJE 2021 tanba kazu COVID-19 kontinua aumenta iha territóriu nasionál.

Ministru Finansa, Rui Gomes, hateten prioridade Governu nian liuhosi orsamentu retifikativu ba Lei OJE 2021 hodi halo prevensaun no kombate pandemia, nomeadamente akizisaun vasina, ekipamentu protesaun individuál, materiál ba teste nian.

Nune’e mós, nia informa, materiál ba médiku kona-ba tratamentu moras internadu, konstrusaun no arrendamentu ba izolamentu no kuarentena lokál foun no hasa’e kapasidade ezistente lokál ne’ebé iha ona.

Nia hateten, medida Governu nian liuhosi orsamentu retifikativu hodi oferese subsídiu estraordinária ba traballadór sira-nia konta própria ne’ebé dedika-aan iha Estadu Emerjénsia, ba mós emprezáriu em nome individuál, traballadór servisu doméstiku no jerente sira.

Iha proposta-alterasaun ba Lei OJE 2201 ne’e mós prevee ba subsídiu estraordinária ba dezempregu, subsídiu estraordinária ba eletrisidade, subsídiu estraordinária de venda, moratoria kréditu, izensaun propina ba estudante sira, subsídiu asesu internet ba estudante sira no distribuisaun alimentu.

Proposta-lei ne’ebé prosede ba primeira alterasaun ba OJE 2021 artikulada ho artigu hamutuk 18 ne’ebé distribui ba kapítulu 4, anexu 1 ho tabela orsamentál 3.

Entretantu, kalendáriu tentativa iha ona maibé Komisaun C sei aprezenta ba reuniaun líder bankada parlamentár hodi foti desizaun. Bainhira kalendáriu diskusaun fixa ona, sei avansa ba audiénsia ba públika ba instituisaun sira-ne’ebé sofre alterasaun, faze jeneralidade no kontinua ba espesialidade.

Hafoin Parlamentu Nasionál aprova iha final global ba proposta-alterasaun ne’e, sei enkamiña ba Prezidente Repúblika hodi foti desizaun promulga ka veta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here