Komunidade mota ibun Ponte Komoro 3. Imajen Tatoli/Antonio Goncalves

DILI, 06 abríl 2021 (TATOLI)—Reprezentante Povu sira iha uma fukun Parlamentu Nasionál, tersa ne’e, aprova votu pezár ho rezultadu votasaun a-favór 45 ba vítima dezastre naturál ne’ebé lakon vida iha loron domingu (04.04) foin lalais ne’e.

Notísia Relevante: Dezastre naturál iha TL, ema 21 lakon vida

“Votu pezár ba vítima cheias (korban banjir) númeru 6/V/3 pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Parlamentu Nasionál aprova votu pezár ne’e ba ema na’in-27 ne’ebé lakon vida iha territóriu nasionál tanba dezastre naturál.

Deputadu Bankada Frente Revolusionária Timor-Leste Independente (FRETILIN), Joaquim dos Santos ‘Boraluli’, konsidera votu pezár tanba ne’e efeitu desizaun polítika durante tinan 10-resin ba kotuk ne’e la konsentra ba bee sira iha foho atu labele suli tama iha Sidade Dili.

“Tinan-tinan ita aprova orsamentu iha parlamentu ida-ne’e ba manutensaun rútina, controlo de cheias laiha maibé to’o ohin loron osan sira-ne’e lori atu halo saida. Nunka halo conterolo de cheias. Dezde hosi I Governu to’o VIII Governu Konstitusionál mak konsentra bee sira hosi foho-leten atu labele husik bee tama iha Sidade Dili, entaun ohin loron ita la sofre,” Deputadu Joaquim dos Santos hateten.

Deputadu Joaquim husu VIII Governu Konstitusionál atu konsentra control de cheias nune’e osan povu nian gasta ho loloos.

“Tanba ne’e, ha’u husu ema-ne’ebé atu hetan responsabilidade ba gasta osan ne’e tenke seletivu. Sofrementu ida-ne’e mai hosi ita-nia ezekutivu sira-nia desizaun ne’ebé laloos, fó osan naran-naran de’it ba ema, gasta arbiru de’it, agora ita halo votu pezár ba povu ne’e, ita moe,” nia kestiona ho tristeza.

Nia husu ba Ministru Asuntu Parlamentu no Komunikasaun Sosiál (MAPKOMS), Francisco Jerónimo atu informa ba ministériu kompetente atu konsentra fulan-neen kona-ba control de cheias ne’e.

“Inundasaun iha Sidade Dili ne’e la’ós foin primeira vez, kada tinan ita aprova osan maibé la uza osan ne’e ho loloos. Relatóriu mai gasta hotu ona maibé realidade la justifika. Ne’e mak ohin loron ita halo votu pezár ba povu ne’e. Ha’u husu tinan oin mai, ita labele aprova tán votu pezár,” nia hateten.

Entretantu, Deputadu Bankada Congresso Nacional de Reconstrução de Timorense (CNRT), Gabriel Soares, fó-sai katak iha área Manatuto nian ema na’in-11 mak lakon vida iha inundasaun ne’e.

“Iha munisípiu Manauto ema na’in-11 mak lakon vida, hetan ona ida maibé 10 dezaparesida (seidauk hetan). Agora daudaun Manatuto-oan oan sira buka-tuir hela iha mota, ne’e kauza hosi kalamidade ka inundasaun ne’ebé liu ona,” nia dehan.

Tanba ne’e, nia husu VIII Governu Konstitusionál uza Orsamentu Jerál Estadu (OJE) 2021, labele fó-sala ba-malu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here