Estrada tohik boot iha Ponte Loes, Munisípiu Liquiça. Imajen Tatoli/Hortencio Sanchez

LIQUIÇA, 06 abríl 2021 (TATOLI) – Ponte Loes, Munisípiu Liquiça, daudaun ne’e iha ameasa, besik  atu kotu, tanba impaktu hosi udan-boot sábadu-domingu (03-04/04).

Notísia Relevante : MOP hahú identifika estragu estrada no ponte kauza dezastre naturál

Rai-monu iha ponte Loes nia rohan ne’ebé fó amesa ba ponte bele kotu. Imajen Tatoli/Hortencio Sanchez

Tuir observasaun Agência Tatoli nian iha terrenu nota katak ponte Loes nia rohan ninin mai lorosa’e nian (hosi Dili ba) tohik no estrada ninin monu tuun no ko’ak boot loos hosi ponte ninin no ponte nia okos.

Situasaun atuál iha Ponte Loes, autoriza de’it karreta ki’ik ho motór maka bele liu, maibé karreta baskulante no trontong sira tula naha-todan labele liu iha ponte leten.

Kondutór karreta kamioneta ne’ebé halai diresaun Bobonaro-Dili, Norberto Pires hateten, sira triste tanba ponte ne’ebé besik kotu ona no bele impede sira-nia movimentasaun hodi tula nesesidade báziku hosi kapitál Dili ba Bobonaro no Maliana.

“Ponte Loes ne’e besik atu kotu ona. Se laiha atensaun emerjénsia, bele lori dezastre tanba bainhira ponte ne’e kotu, maka ligasaun Dili ba fronteira Batugade atu transporta nesesidade báziku hosi Atambua mai Dili susar ona no ami sira iha Bobonaro atu ba Dili mós arraska,” Norberto Pires hateten.

Ponte Leos ne’ebé harii iha tinan 1991 no inaugura hosi Prof. Dr. Ir. B.S Mulyana,  nu’udar Sekretáriu Estadu Planu no Dezenvolvimentu Nasionál tempu ne’ebá, bele konsidera hanesan ponte prinsipál  tanba liga kapitál Dili ho Bobonaro, inklui sai media importante liga ho Atambua, Belu, Timor Osidentál.

Iha fatin hanesan komunidade ne’ebé hela besik iha ponte ne’e, Manuel Amaral haktuir bainhira ponte ne’e hetan estraga hosi mota autoridade lokál tun ona iha fatin ne’e hodi hare diretamente.

“Xefe Suku sira no autoridade kompetente sira balun hosi nasionál mai ona iha fatin ne’e haree diretamente kondisaun ponte ne’e, maibé ita hein de’it bainhira maka Governu atu hadi’a no normaliza,”  Manuel Amaral tenik.

Iha parte seluk mota Loes mós konsege estraga komunidade nia uma hamutuk 100-resin, inklui sasán-sira uma-laran nian.

Salvadór dos Santos, nu’udar vítima ba inundasaun iha Loes informa, daudaun ne’e sira hela de’it iha família nia uma tanba uma ne’ebé sira nian hetan estraga total.

“Agora ami hela de’it ho viziñu uma ha’u nian mak maun sira haree rasik ne’e buat ida la salva, ami salva ami nia isin lolon de’it,” Salvadór dos Santos hateten.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here