Ministru Obra Públika, Salvador Eugênio Soares dos Reis Pires, halo koordenasaun iha terrenu ho entidade relevante, domingu (04/04). Imajen/MOP

DILI, 05 abríl 2021 (TATOLI)Governu liuhosi Ministériu Obra Públika (MOP) hahú halo identifikasaun ba estragu estrada no ponte kauza hosi inundasaun ne’ebé akontese iha sábadu (03/04) to’o domingu (05/04) iha munisípiu balun inklui Dili.

“Ohin ami reuni hela dadus no agora daudaun ekipa halo hela identifikasaun atu kuantifika dadus hodi halo dezeñu tékniku no intervesaun ba situasaun sira ne’e,” Ministru Obra Públika, Salvador Eugênio Soares dos Reis Pires, hateten hafoin enkontru ekipa Konsellu Ministeriál iha Palásiu Governu, segunda ne’e.

Hafoin inundasaun iha domingu horiseik, governante ne’e observa direta ponte iha Dili ne’ebé risku ba dizastre naturál no nota katak infraestrutura hanesan estrada, ponte no moru retensaun barak mak hetan estragu, inklui komuniadade nia uma no edifísiu públiku sira mós bee tama.

“Ita haree situasaun grave hanesan estrada urbana kotu iha Embaixada Japaun nia oin, Bebonuk, ponte Bidau, Becora seluk tan. Iha munisípiu sira hanesan ponte Loes no ponte Nunura iha Liquiçá tenke hadi’a tanba ne’e fó ameasa ba motórista sira ne’ebé halo movimentasaun iha área hirak ne’e,” nia akresenta.

Notísia relevante: IGE konsentra normaliza mota área risku ba populasaun

Daudaun, MOP fó ona orietasaun ba Institutu Jestaun Ekipamentu (IGE, sigla portugés) no Diresaun Jerál Obra Públika atu halo normalizasaun hasai sedimentasaun sira ne’ebé iha mota no estrada sira.

Ministru dehan, intervensaun dahuluk ne’e kolektiva hosi parte IGE no setór privadu balun, ne’ebé hahú horsehik no kontinua ohin halo atividade normalizasaun atu fó tempu ba komisaun ministeriál kuantifika dadus ba retensaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here