Ekipa saúde iha antiga ospitál Lahane. Imajen Tatoli/Maria Auxiliadora.

DILI, 06 abril 2021 (TATOLI)—Ministériu Saúde (MS) fó ona treinamentu ba ema na’in 27 hosi Postu Administrativu Metinaro, hodi haloot mate-isin ne’ebé kauza hosi COVID-19.

Ema na’in 27 ne’e, ohin hahú hala’o knaar hodi haloot mate-isin ne’ebé hakotu iis tanba COVID-19, iha semitériu Metinaro.

Notísia relevante:COVID-19: TL hahú rejista kazu mate ida

“Ema na’in 27 mak sei simu, tula no haloot mate-isin iha semitériu ne’ebé Governu prepara,” Vise-Ministru Administrasaun Estatál, Lino de Jesus Torrezão, hateten ba jornalista Agência Tatoli via telefónika, tersa ne’e.

Lino Torrezão  hateten, ema na’in 27 ne’e  preparadu duni atu simu, tula no haloot mate-isin kauza hosi COVID-19, tanba sira hetan formasaun.

“Ha’u fiar no garante katak sira ne’e forsa no iha duni esperiénsia natón atu simu no haloot mate-isin tanba antes ne’e sira simu ona formasaun hosi parte Ministériu Saúde,” nia subliña.

Kona-bá subsídiu ba ema hirak ne’e, nia hateten, Governu sei fó duni subsidiu tanba konsidera sira mós serbisu iha fatin risku.

“Maske subsídiu seidauk klaru, maibé ha’u hatene katak sira sei hetan. Ita seidauk iha númeru serteza  atu justifika kona-bá subsídiu ne’e, tanba osan suplementár agora mak atu ko’alia iha Parlamentu Nasionál,” membru Governu ne’e hateten.

Jornalista: Osória Marques

Editór: Câncio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here