SAMES hetan apoiu hosi Grupu Mama Bolu no PNTL asegura hela ai-moruk. Imajen/grupu Mama Bolu.

DILI, 05 abríl 2021 (TATOLI)—Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins, informa inundasaun ne’ebé akontese iha sábadu no domingu (3-4 abríl), estraga ekipamentu protesaun individuál COVID-19, ne’ebé rai iha armazén sentrál Kampung Alor.

Kona-bá ai-moruk ne’ebé rai iha armazén ne’e la hetan estragus, tanba pesoál-sira konsege salva no transporta ba fatin seguru.

Notísia relevante:Produtu iha SAMES menus 53%

“Ami konsege asegura ai-moruk sira 100% no la estraga. Maibé, ita iha problema mak ekipamentu protesaun individuál COVID-19 nian mak bee estraga hotu,” Santana Martins hateten ba jornalista Agência Tatoli iha kna’ar fatin SAMES, segunda ne’e.

Oras ne’e ekipa sei kontinua halo kontajen ba ekipamentu ne’ebé hetan estragus, maibé provizoriamente deklara katak, ekipamentu COVID-19 ne’ebé hetan estragus mak hanesan xapeu, máskara, roupa no luvas.

“Kona-bá kuantidade ho orsamentu hira mak lakon, ami seidauk deklara  tanba agora ami sei kontinua asegura ita-nia produtu hirak-ne’e. Ami mós esforsu hela atu iha tempu badak bele relata  ba autoridade-sira kona-bá ita-nia ekipamentu ne’ebé estragadu,” nia esplika.

Santana Martins garante katak, fatin atu rai ai-moruk vasina COVID-19, seguru hela no garantidu atu bele rai AstraZeneca ne’ebé ohin to’o ona Timor-Leste (TL).  

Tanba ne’e, nia husu nafatin ba parte Eletrisidade Timor-Leste (EDTL) atu mantein kontrola liña eletrisidade iha área Kampung Alor, nune’e bele asegura ai-moruk ne’e.

Entretantu, ekipa ne’ebé fó apoiu ba SAMES hodi salva ai-moruk durante inundasaun mak hanesan ekipa Mama Bolu, Polísia Nasionál Timor Leste no seluk tan.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here