Karreta funerál ne’ebé tula mate-isin COVID-19, iha antiga Ospitál Lahane. Imajen Tatoli/Maria Auxiliadora.

DILI, 06 abríl 2021 (TATOLI)—Sala Situação Centro Integrado Gestão de Crise (SS-CIGC), liu hosi Koordenadór Pilár VII no Jestaun Crise COVID-19, Nilton da Silva anunsia katak, Timor-Leste (TL) ohin rejista kazu mate na’in ida.

“Ohin tuku 07:10 ita rejista kazu COVID-19 ne’ebé mate ho Chronic kidney failure,” Nilton da Silva fó-sai asuntu ne’e ba jornalista-sira iha fatin izolamentu, antiga ospitál Lahane, tersa ne’e.

Notísia relevante:COVID-19: kazu foun 52, rekoperadu 27 no ativu 472

Nia esplika, kazu mate ne’e feto ho idade 44, detetadu iha 24 marsu no halo tratamentu dahuluk iha sala izolamentu Tasi-tolu.

Iha tratamentu dahuluk, médiku-sira halo observasaun ne’ebé hahú mosu síntoma iha 4 abríl lorokraik, no médiku-sira fó atendimentu tuir padraun kazu lizeiru, maibé laiha mudansa.

“Horisehik dadeer halo transferénsia ba fatin izolamentu kazu grave-nian iha Vera Crus, maibé tanba inundasaun, entaun provizoriamente uza antiga ospitál Lahane,” nia subliña.

Tuir observasaun médiku-sira katak, pasiente ne’e mai ho kondisaun grave ka asismetabóliku, iha ninia istória tratamentu moras tensaun ne’ebé laiha kontrola, hodi hamosu problema ba iha rins, ikus-mai rezulta rins króniku ka Chronic kidney failure.

Nune’e, nia hatutan, médiku-sira fó duni atendimentu tuir padraun ne’ebé mak iha, maibé to’o ohin dadeer pasiente ne’e hakotu iis.

Kona-bá inisiál hosi matebian, SS-CIGC mak sei fó-sai ofisialmente no planu tuir-mai sei trata matebian nia-isin hanesan pasiente ne’ebé mak mate ho COVID-19.

Tanba ne’e, ekipa Ministériu Saúde (MS) sei serbisu hamutuk ho Ministériu Solidariedade Sosiál no Inkluzaun (MSSI), no mós ekipa hosi Ministériu Administrasaun Estatál (MAE) atu bele hala’o prosesu funerál.

“MS sei entrega ba MSSI atu lori mate-isin ba haloot iha fatin ne’ebé mak prepara ona ba COVID-19, iha Metinaro,” médiku ne’e haktuir.

Tuir planu, serimónia funerál ba mate-isin iha Metinaro sei fahe ba ekipa rua kompostu hosi Zona A  hanesan fatin ne’ebé atu hakoi mate-isin, no zona B hanesan fatin ba família-sira ne’ebé akompaña prosesu.

Oras ne’e daudaun, matebian ninia kaben no oan mós pozitivu COVID-19, ne’ebé hetan lisensa atu bele partisipa iha serimónia funerál no sei fila hikas ba iha izolamentu atu kontinua hetan asisténsia médika.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here