Médiku-sira halo teste swab ba komunidade Fatumeta, Dili, Segunda (15/03/21). Imajen Tatoli/António Gonçalves.

DILI, 05 abríl 2021 (TATOLI)— Sala Situação Centro Integrado Gestão de Crise (SS-CIGC), rejista kazu pozitivu foun COVID-19 durante loron rua (4-5 abríl) hamutuk na’in 52, kazu rekoperadu na’in 27 no númeru pasiente atuál 472.

“Kazu foun iha 52, rekoperadu 27 no totál ativu 472. Hosi kazu foun hirak ne’e mane 31, feto 21.  Sintomátiku na’in-rua no asintomátiku 50,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai dadus ne’e, liu hosi konferénsia imprensa iha Centro Convenções Dili (CCD), segunda ne’e.

Notísia relevante:COVID-19, pozitivu 37 no rekoperadu 51

Hosi kazu foun ne’ebé detetadu iha loron rua ne’e, kompleta kazu detetadu iha Munisipiu Díli hosi 7 marsu 2021, to’o ohin 5 abril 2021, hamutuk hotu 615.

Ho baze ba informasaun ne’ebé ekipa konjunta saúde nian rekolla, sei halo revizaun ba lista foku  ka cluster kazu pozitivu iha Dili, no sei publika iha loron hirak tuir-mai.

SS-CIGC aproveita informa ba públiku katak, hosi kazu foun 52 ne’e, iha mós kazu 1 hosi Ataúro. Kazu ida ne’e kontaktu-besik ho sira hosi Ataúro ne’ebé anunsía ona loron hirak liu bá.

Iha 3, 4 no 5 abríl, maski Labortóriu Nasionál Saúde (LNS) hetan efeitu hosi inundasaun, kontinua funsiona nafatin, no hamutuk hotu halo testes PCR ba ema 688  (iha loron 2 nia laran), inklui  teste 279 ba ema ne’ebé halo pedidu atu hetan autorizasaun esesionál hodi sai hosi serka sanitária iha Munisipiu Dili.

Apela ba populasaun Timor-Leste tomak, liu-liu iha Dili no Munisípiu sira ne’ebé afetadu ho inundasaun iha loron hirak ne’e nia laran, ba sira ne’ebé maski lakon uma, sasan no hela fatin, no tenki evakua ba fatin publiku-sira, halo favor nafatin uza meiu hotu ne’ebé iha atu nafatin hado’ok-an hosi kontájiu moras Covid-19, liu-liu nafatin uza máskara, no fase liman beibeik ho bé no sabaun ka dezintetante ruma.

Husu mós ba populasaun ne’ebé provizoriamente tenki hela iha sentru evakuasaun-sira, atu kolabora ho ekipa konjunta saúde, hodi foti amostra ba análize laboratóriu.

Ba populasaun ne’ebé la afetadu hosi efeitu inundasaun, favor respeita nafatin regra-sira ne’ebé Governu hatu’ur ona atu prevene moras COVID-19 da’et ba mai.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here