Diretora armajenamentu SAMES, Saturlina Ximenes. Foto/Felicidade Ximenes.

DILI, 21 janeiru 2021 (TATOLI)— Oras ne’e daudaun, produtu hotu-hotu ne’ebé iha armajenamentu Serbisu Autónomu Medikamentu Ekipamentu Saúde (SAMES), menus ona to’o pursentu 53.

“Produtu sira ne’ebé menus ona mak hanesan, estoke medikamentu, konsumíveis, laboratóriu no mós produtu ba item espesialidade sira. Produtu hirak ne’ebé menus ona, liu-liu medikamentu, SAMES sosa iha tinan 2018, 2019 no 2020,” Diretora armajenamentu SAMES, Saturlina Ximenes, hateten iha serbisu fatin Kampung Alor, kuarta ne’e.

Notísia Relevante:SAMES destroi ai-moruk 3%

Diretora ne’e esplika, kategoria produtu medikamentu ne’ebé oras ne’e daudaun estoke laiha hamutuk item sia kompostu hosi ai-moruk vitál, esensiál ho la’ós esensiál ne’ebé antes ne’e sosa hamutuk 454, oras ne’e sei disponível 287 (63%) estoke laiha ona 167 (37%).

Kona-ba produtu konsumíveis ho totál item 430, nia dehan, sei disponível hamutuk item 241 (56%) no laiha ona 189 44%. Produtu laboratóriu ho totál item ne’ebé sosa 577, sei disponível 250 (43%), laiha ona 327 (57%).

Nia hatutan, ekipamentu médiku ho item ne’ebé sosa 74, sei disponível 39 (53%), laiha ona 35 (47%) no Radiology, item ne’ebé sosa hamutuk 21, sei disponível 12 (57%), laiha ona 9 (43%), Haemodialysis  hamutuk 14, sei disponívél 11 (79%), laiha ona 3 (21%).

Alende ne’e, espesialidade item ne’ebé sosa hamutuk 98, sei disponível 12 (12%), laiha ona 86 (88%), dentál item 111, sei disponível 26 (23%), laiha ona 85 (77%), Eye konsumíveis totál item 91, disponível 3 (3%) laiha ona 88 (97%).

“Oras ne’e daudaun SAMES halo hela esforsu atu rezolve problema ai-moruk ne’ebé estoke laiha no iha hela prosesu atu sosa iha parte aprovizionamentu,” nia informa.

Prosesu seluk, nia dehan, SAMES mós halo esforsu atu arranja hela item espesialidade sira ne’ebé konsidera emerjénsia tebes atu fasilita nesesidade médiku sira hodi hala’o atendimentu ba pasiente.

Durante ne’e SAMES asegura kualidade medikamentu tuir padraun ne’ebé mai hosi fábrika dehan katak, tenke tau iha fatin ho temperatura normál ka malirin, hafoin bele halo distribuisaun bazeia ba pedidu ne’ebé hetan aprovasaun hosi Diresaun Nasionál Farmásia (DNF).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here