DILI, 01 abríl 2021 (TATOLI)—Fundu Nasaun Unida ba Infánsia (UNICEF), liuhosi COVAX facility sei transporta ai-moruk vasinasaun COVID-19 ho tipu AstraZeneca, hamutuk dozes rihun 24 mai Timor-Leste (TL), ne’ebé tuir planu sei to’o iha segunda (05/04/21).
Ministra Saúde (MS), Odete Maria Freitas Belo hateten, ai-moruk hirak ne’e sei to’o iha Aeroportu Internasionál Nicolau Lobato iha tuku 13:00 ho aviaun My Indo Airlines.
Notísia relevante:Governu garante vasina AstraZeneca sei to’o Timór
“Ministériu Saúde hamutuk ho parseiru dezenvolvimentu-sira hamutuk ho Ministériu relevante, konvida Primeiru Ministru Taur Matan Ruak atu bele ba hola parte hodi simu vasina iha Aeroportu,” Odete Maria Freitas Belo hateten ba jornalista-sira liu hosi konferénsia imprensa iha salaun SAMES, Kampung Alor, kinta ne’e.
Governante ne’e agradese ba COVAX facility no mós ba parseiru no doadór-sira ne’ebé fó sira-nia apoiu hodi fasilita vasina ida ne’e to’o TL, tanba iha nasaun barak mak presiza vasina ida ne’e.
Nia hatutan, nasaun hotu-hotu tantu nasaun ki’ak ka riku, kiik ka boot hetan vasina ida ne’e liu hosi apoiu COVAX facility.
Iha fatin hanesan Diretora Jerál Prestasaun Serbisu Saúde, Ministériu Saúde, Odete da Silva Viegas, hateten ai-moruk ne’ebé sei to’o uluk, Ministériu sei fahe tuir prioridade ne’ebé define ona mak hanesan liña frente kompostu hosi pesoál saúde, F-FDTL, PNTL, média, Imigrasaun, Alfándega, ema sira ne’ebé moras inklui sira ne’ebé ho idade 60 ba leten.
Tuir planu, Governu sei lansa programa vasinasaun ne’e iha 7 abríl no distribui kedan ba munisípiu-sira ne’ebé determina ona.
Jornalista: Felicidade Ximenes
Editór: Cipriano Colo
