MSSI distrbiui foos saka 5094 ba UNTL hodi apoia ba estudante sira ne’ebé hela iha kost. Imajen/Espsiál

DILI, 03 abríl 2021 (TATOLI)-Governu liuhosi Ministériu Solidariedade Sosiál no Inkluzaun(MSSI), sábadu ne’e,  distribui foos saka 5094 ba Universidade Nasionál Timor Lorosa’e (UNTL) hodi apoia ba estudante sira ne’ebé mak hela iha kost.

“Apoiu umanitáriu ne’ebé Governu liuhosi MSSI servisu  hamutuk ho Ministériu Ensino Superiór  ho UNTL atu fó subsídiu foos ba alunu sira ne’ebé mak hela iha kost,” Vise Reitór Asuntu Akadémiku Garantia Kualidade UNTL,  Samuel  de Sousa  Freitas, informa  ba  Agência Tatoli iha UNTL, Caicoli, Dili.

Notísia Relevante : MSSI oferese foos ba estudante universitáriu 2.693 iha kost Dili

Nia hateten, faze dahuluk ne’e  simu  ona ema hamutuk 30  no foos saka 30   fahe ba iha fakuldade siénsia exata  ninia estudante. Ba faze daruak agora daudaun  ba sira ne’ebé mak momentu seidauk simu iha faze dahuluk nian  tanba lista sira ne’e hatama iha 26 marsu 2021  hamutuk estudante  5094, nune’e foos mós mai tuir númeru ida-ne’e.

Nia esplika atu distribui foos ba estudante sira mak hasoru dezafiu balun hanesan tenke kumpre regra ne’ebé  mak Ministériu Saúde ho Organizasaun Mundiál Saúde (OMS) estabelese ona katak uza  nafatin máskara,  halo  distansiamentu sosiál   no dezafiu seluk maka estudante balun naran laiha.

Iha fatin hanesan estudante UNTL hosi Fakuldade Agrikultura, Departamentu Peska  no Marinna, Joaquina  Monteiro Guterres, agradese ba Governu liuhosi MSSI ho UNTL ne’ebé fó apoiu ona estudante sira ne’ebé mak hela iha kost iha situasaun serka sanitaria nia laran.

“Ha’u agradese ba MSSI ho UNTL bele apoiu ona ami ne’ebé mak hela iha kost ho foos saku ida atu ami bele han   hodi enfrenta situasaun serka sanitaria ida-ne’e,”  Joaquina  Monteiro Guterres hateten.

Jornalista   : Felicidade Ximenes

Editór        : Francisco Simões

HAKEREK NO HATÁN

Please enter your comment!
Please enter your name here