Primeiru-Ministru, Taur Matan Ruak hamutuk ho membru Governu diskute pedidu renovasaun deklarasaun EE ba -dala XI husi Prezidente Repúblika, iha sala plenária PN, segunda (01/03). Imajen TATOLI/Egas Cristóvão.

DILI, 01 marsu 2021 (TATOLI)—Reprezentante Povu iha Uma Fukun Palamentu Nasionál (PN), segunda ne’e, autoriza Prezidente Repúblika Francisco Guterres ‘Lú Olo’ dekreta Estadu Emerjénsia (EE) ba dala-XI iha territóriu nasionál.

Notísia Relevante: KE-KSDS rekomenda ba Xefe Estadu husu PN estende Estadu Emerjénsia

Iha renovasaun Estadu Emerjénsia ba dala-XI ne’e autorizadu ho rezultadu votasaun nominál a-favór 53, kontra 0 no abstensaun 12.

“Ho nune’e lei autorizasaun deklarasaun Estadu Emerjénsia aprovadu. Ho aprovasaun ne’e espera Governu implementa ho didi’ak no parlamentu kontinua fó konfiansa ba Governu,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária, Parlamentu Nasionál.

Bazea ba mensajen Prezidente Repúblika Francisco Guterres ‘Lú Olo’ nian propoin ba Parlamentu Nasionál katak aplikasaun Estadu Emerjénsia XI ne’e hahú hosi oras 00.00 iha loron 4 marsu 2021 (kinta-feira) no termina iha oras 23.59 loron 2 abríl 2021 (sesta-feira).

Mensajen Xefe Estadu nian iha estensaun Estadu Emerjénsia ba dala-XI ne’e, iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun selebrasaun relijioza.

Nune’e mós dieitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.

Purtantu, direitu rezisténsia sei impede hosi autoridade públika bainhira sidadaun sira la kumpre medida ezekusaun sira.

Xefe Bankada Bankada CNRT, Deputadu Duarte Nunes, hateten Governu presiza valoriza no konsidera forsa no seguransa sira tanba to’o ohin loron ema hotu-hotu hakmatek.

“Presiza destaka tán forsa sira ba iha fronteira, hodi kontrola nune’e moras ne’e labele ba fali maluk sira seluk. Presiza halo kontrolu ba kuarentena sira tanba ladún efetivu, balun halai sai hosi kuarentena. Ema estranjeitu atu mai tenke vasinadu mak mai,” Xefe Bankada CNRT ne’e informa liuhosi debate estensaun EE ba dala-XI, iha plenária Parlamentu Nasionál.

Xefe Bankada CNRT ne’e fó hanoin ba Governu atu fó subsídiu ba sidadaun sira iha área fronteira tanba komunidade sira iha ámbitu serka sanitária.

“Forsa sira tenke kondisaun mínima. Tanba, ema-ne’ebé tama ilegál mai ne’e forsa sira mak halo kontaktu direta, tanba ne’e presiza ekipamentu protesaun pesoál. Ita hotu kontribui para moras ne’e labele hada’et ba ema seluk,” Xefe Bankada CNRT ne’e hateten.

Entretantu, Xefe Bankada FRETILIN, Deputadu Francisco Miranda Branco, hateten Timor-Leste la aplika sansionatória mak sei labele konsege trava transmisaun komunitária iha propagasaun surtu COVID-19 ne’e.

“Serka sanitária, ita presiza aplika no konserteza ita-nia ekonomia atuál afetadu. Tanba ne’e, ita presiza halo intervensaun ai-han ba iha populasaun iha Covalima. Konfinamentu ida-ne’e, populasaun labele sai buka ai-han,” Xefe Bankada FRETILIN ne’e hateten.

Nia husu Governu tau atensaun ba komunidade sira iha fronteira ne’ebé asesu kréditu tanba iha ámbitu serka sanitária ne’e labele hetan osan.

Vise-Xefe Bankada Partidu Libertasaun Populár (PLP), Deputadu Francisco Vasconcelos, hateten Timor-Leste foin konta ema númeru kona kazu COVID-19 maibé nasaun barak iha mundu sura ema mate ba moras ida-ne’e.

Bankada PLP apresia esforsu Governu nian ne’ebé foti desizaun rápida hodi deside serka sanitária (lockdown) iha área fronteira, liuliu Covalima no Bobonaro.

“Nasaun barak arrepende maibé liu tiha ona, sorte ita laiha. Timor-Leste sei iha tempu maibé ita tenke utiliza tempu ne’e ho loloos. Bankada PLP husu di’ak liu lockdown totál. Medida sira foti ne’e tenke forte, labele longgar fali,” Vise-Xefe Bankada PLP ne’e esplika.

Bankada PLP husu ba Governu foti medida rigorozu liután iha fulan rua ka tolu tuir mai, tanba prevensaun forte liután iha territóriu nasionál.

Xefe Bankada Partidu Demokrátiku, Deputadu António da Conceição, hateten intensaun  Estadu Emerjénsia atu redus kontájiu moras COVID-19, tanba ne’e sei apoia medida ne’ebé Governu sei hasai.

“Bankada PD husu planu vaninasaun ne’e hahú hala’o sensibiilzasaun ba komunidade sira,” nia dehan.

Xefe Bankada Kmanek Haburas Unidade Nacional Timor Oan (KHUNTO), Deputada Olinda Guterres, propoin lockdown iha territóriu nasionál.

“Preziza lockdown totál ba iha territóriu nasionál. Tanba ne’e, bankada KHUNTO husu sidadaun sira atu kumpre medida prevensaun no bankada KHUNTO sei vota a-favór ba estensaun ida-ne’e,” Xefe Bankada KHUNTO dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here