Mapa Baucau-Viqueque. Imajen/Wiki

DILI, 01 abríl 2021 (TATOLI)–Governu deside halo renovasaun serka sanitária no konfinamentu domisiliáriu obrigatóriu jerál iha munisípiu Dili durante loron 14 no munisípiu Baucau no Viqueque loron hitu.

“Konsellu Ministru aprova projetu Rezolusaun Governu ba impozisaun serka sanitária no konfinamentu domisiliáru jerál populasaun nian iha munisípiu Dili to’o oras 23:59 loron 17 abríl 2021 no iha munisípiu Baucau no Viqueque to’o oras 23:59 loron 10 abríl 2021,” Ministru Prezidénsia Konsellu Ministru, Fidelis Manuel Leite Magalhães relata hafoin ramata reuniaun Konsellu Ministru iha Palásiu Governu, kinta ne’e.

Notísia relevante: Governu renova serka sanitária iha Baucau-Viqueque to’o 02 abríl

Biban ne’e, Portavós Governu apela ba populasaun atu mantein regra hotu ne’ebé define ona iha anteriór Rezolusaun Governu ne’ebé impoin ona serka sanitária sira no konfinamentu domisiliáriu iha munisípiu sira ne’e.

Nune’e kontinua bandu sirkulasaun ema entre munisípiu sira ne’e no iha munisípiu seluk, exetu  iha kazu sira ne’ebé ho fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku.

Notísia relevante: Governu deside estende serka sanitária iha Dili to’o 02 abríl

“Mantein nafatin mós impozisaun no konfinamentu domisiliáriu jerál ba ema hotu ne’ebé hela no daudaun ne’e iha munisípiu Dili, Baucau no Viqueque, exetu ba razaun sira ne’ebé mak antes ne’e define ona, liuliu razaun sira ba saúde, ba serbisu, no asesu ba sasán no servisu hanesan primeira nesesidade nian,” governante ne’e fó hanoin.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here