Mapa Baucau-Viqueque. Imajen/Wiki

DILI, 29 marsu 2021 (TATOLI)Konsellu Ministru (KM) aprova Projetu Rezolusaun Governu, ba renovasaun impozisaun serka sanitária no konfinamentu domisiliáriu jerál ba populasaun iha munisípiu Baucau no Viqueque to’o tuku 23:59 loron 02 abríl 2021.

Ministru Prezidénsia Konsellu Ministru, Fidelis Manuel Leite Magalhães, apela ba abitante atu mantein nafatin regra hotu ne’ebé antes ne’e define ona iha Rezolusaun Governu.

“Ho renovasaun ne’e, kontinua bandu sirkulasaun ema entre munisípiu rua ne’e ho munisípiu seluk, exetu iha kazu fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku ka ba realizasaun interese públiku,” Ministru Fidelis hateten hafoin reuniaun ezekutivu liuhosi vídeo konferénsia, segunda ne’e.

Notísia relevante: Governu impoin serka sanitária iha Baucau no Viqueque to’o 29 marsu

Tuir Portavós Governu, desizaun ne’e inklui mós konfinamentu domisiliáriu jerál iha munisípiu Baucau no Viqueque, exetu iha razaun ne’ebé antes ne’e define ona, liuliu ba razaun saúde, servisu, no asesu ba sasán inklui servisu esensiál sira.

Reuaniun Konsellu Ministru estraórdinaria ne’ebé hala’o iha segunda ne’e, prezide hosi Vise Primeiru-Ministru no Ministru Planu no Ordenamentu, José Maria dos Reis.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here