Prezidente Konsellu Administrasaun APORTIL, Flávio Cardoso Neves. Imajen TATOLI/Egas Cristóvão

DILI, 12 marsu 2021 (TATOLI)–Kontrusaun Ró Berlin Nakroma 2 ne’ebé konstrui iha Xina liuhosi finansimentu Governu Timor-Leste no Alemaña, daudaun besik finaliza ona no iha fulan setembru sei to’o Timor-Leste.

“Ita espera oráriu kontrusaun ró ne’e, tuir loloos tuir tempu ne’ebé ita determina ona, iha setembru bele to’o iha ne’e,” Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, informa iha Portu Dili, sesta ne’e.

Governu Timor-Leste halo ona pagamentu 79% ba konstrusaun ró ne’e no restante sei kompleta bainhira konklui.

APORTIL halo nafatin akompañamentu tékniku no administrativa hodi bele halo pagamentu ba kompañia.

“Ha’u hanoin APORTIL koordena ona ho finansa, nune’e bele hamutuk ho ministériu relevante bele haree asuntu ne’e. Tuir akompañamentu ne’ebé parte tékniku APORTIL halo kada semana liuhosi vídeo konferénsia,  progresu konstrusaun fízika agora hein tama ba tasi,” nia akresenta.

Konsultór Ró Nakroman 2 mak IMS Nord, Móller GmbH hosi Alemaña, ne’ebé hanesan konsultór ba projetu boot.

“Ita tenke hetan konsultór hosi sira no sira maka halo dezeñu,  hafoin sira maka tenke halo akompañamentu tékniku hamutuk ho Governu Timor-Leste hosi APORTIL, to’o ró ne’e mai Timor-Leste,” nia hatutan.

Iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agustinho da Silva, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlin Nakroma II.

Projetu ne’e Governu Alemaña kontribui millaun €7,8 no Timor-Leste millaun €7,1.

Tuir planu ró ne’e sei halo operasaun dahuluk iha tinan 2021, ho destinasaun hosi Dili bá Manatuto, Baucau, Lospalos no Viqueque.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here