Estudante Colégio Santo Inácio de Loiola, Casait-Liquiça, fase liman antes tuir prosesu aprendizazen. Imajen Tatoli/António Gonçalves.

DILI, 01 abríl 2021 (TATOLI)—Estudante hosi Ensino Secundario Geral (ESG) no Ensino Secundario Tecnico Vocacional (ESTV) na’in 30.369, sei tuir ezame periúdu dahuluk iha segunda 12-16 abríl 2021.

Diretór Jerál ESG-ESTV, Ministériu Edukasaun Joventude no Desportu (MEJD), Deolindo da Cruz, hateten dadus jerál ba totál estudante ne’ebé MEJD iha hamutuk 73.166.

Notísia relevante:MEJD lansa programa eskola ba uma no tele-eskola

Hosi númeru ne’e, ESG iha 57.921 no ESTV 15.245, maibé estudante ne’ebé atu tuir ezame iha segunda 12-16 abríl, iha de’it 30.369, tanba estudante 42.796 hosi Munisípiu Covalima, Dili, Baucau, Viqueque no Lautém, kontinua iha hela situasaun serka sanitária no konfinamentu obrigatóriu.

Deolindo da Cruz dehan, totál estudante 42.797 hosi Munisípiu lima ne’ebé la tuir ezame periúdu dahuluk ne’e, MEJD fó oportunidade ba Serbisu Edukasaun Munisípál-sira, atu deside hodi hili opsaun rua ne’ebé iha mak hanesan formativa ka sumativa.

“Signifika, sira hakarak deside modalidade formativa entaun bele realiza sistema avaliasaun ba estudante sira. Maibé, bainhira sira deside modalidade sumativa, entaun estudante-sira bele hein to’o situasaun normál mak foin bele tuir ezame,” Deolindo da Cruz hateten ba jornalista Agência Tatoli, iha salaun MEJD Vila Verde, kinta ne’e.

Maski nune’e, Diretór Jerál ne’e informa katak, MEJD hamutuk ho Gabinete jurídiku halo ona preparasaun atu halo alterasaun ba despaixu kona-bá modalidade avaliasaun ezame periúdu dahuluk-nian, tanba Munisípiu afetadu lima ne’e labele kumpre ona kalendáriu normál.

“Kuandu despaixu ne’e prontu ona, ami sei fó-sai avizu ba Munisípiu lima ne’ebé afetadu hodi kumpre de’it sistema ezame periúdu dahuluk-nian, liu hosi avaliasaun-sira,” nia subliña.

Entretantu, estudante na’in 30.369 ne’ebé sei partisipa ezame periúdu dahuluk mai hosi Munisípiu ualu mak hanesan, Manatuto, Manufahi, Ainaro, Aileu, Ermera, Bobonaro, Liquiça no Rejiaun Administrativa Espesiál Oe-cusse Ambeno (RAEOA).

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here