Ilustrasaun Vasina. Imajen/Espesiál

DILI, 31 marsu 2021 (TATOLI)–Primeiru-Ministru (PM), Taur Matan Ruak, garante katak vasina ho tipu AstraZeneca sei to’o Timór iha tempu badak maski seidauk iha data serteza.

Maski hasoru dezafiu iha asesu ba vasina sira, maibé ho apoiu sistema COVAX, ne’ebé kria liuhosi protesaun Organizasaun Nasaun Unida (ONU) no administra hosi Organizasaun Mundiál Saúde (OMS) ne’ebé serbisu hamutuk ho UNICEF, bele atu benefisia nasaun membru 92, inklui Timor-Leste.

“Liuhosi sistema globál ne’e, garante katak iha tempu badak vasina sira sei to’o iha ita-nia nasaun. Maibé, seidauk iha data fiksu,” PM Taur relata iha ámbitu diskusaun pedidu renovasaun Estadu Emerjénsia (EE) da-XII iha Parlamentu Nasionál (PN), kuarta ne’e.

Enkuantu, Governu kontinua esforsu liuhosi kontatu ho entidade internasionál oinoin, ne’ebé ho objetivu atu garante asesu vasina iha prazu badak, tuir kompromisu Estadu atu proteje populasaun tomak.

“Bainhira vasina sira ne’e to’o mai, sai nu’udar responsabilidade ita hotu atu kontribui hodi evita katak timor-oan ida labele mate tanba vírus ida-ne’e,” nia subliña.

Tuir Xefe Governu, daudaun ne’e hanesan esperansa foun ba nasaun hotu ne’ebé enfrenta hamutuk kalamidade atu hetan asesu ba vasina.

“Maibé, hanesan instrumentu importante ida atu kombate vírus, vasina sujeita ba prokura ida maka’as tebes iha merkadu internasionál sira, ne’ebé koloka husi presaun entidade produtora no ninia país esportadór sira,” nia akresenta.

Ho nune’e, Governu kontinua husu ba populasaun atu kumpre nafatin medida prevensaun no mitigasaun COVID-19, ne’ebé estabelese ona husi komunidade internasionál, hanesan restrisaun ba viajen sira no ba konfinamentu.

“Sei implementa mós husi ita hodi hamenus propagasaun COVID-19, hodi fó tempu ba vasina ne’ebé mak administra ona iha país sira seluk bele to’o lalais mai Timor-Leste hodi fó imunizasaun ba populasaun timor-oan tomak,” nia akresenta.

Xefe Governu ne’e dehan, daudaun iha hela preokupasaun ba kompetisaun internasionál ne’ebé mosu iha negósiu boot kona-ba vasina sira, ne’ebé ninia efeitu ameasa atu tau iha planu daruak ba nasaun sira ne’ebé menus dezenvolvida hanesan Timor-Leste, nune’e fó prejuízu ba nasaun boot no dezenvolvida sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here