Imajen/Media PR.

DILI, 31 marsu 2021 (TATOLI)—Parlamentu Nasionál (PN) kuarta ne’e fó autorizasaun ba Prezidente Repúblika (PR) Francisco Guterres ‘Lú Olo’ dekreta Estadu Emerjénsia ba dala-XII.

Iha renovasaun deklarasaun Estadu Emerjénsia ba dala-XII aprovada ho rezultadu votasaun nominál a-favór 49, kontra 0 no abstensaun 14.

Notísia Relevante: Aban, PN debate renovasaun Estadu Emerjénsia ba dala-XII

“Nu’udar observasaun ikus no meza kaer ba rekomendasaun hosi CIGC Unidas na ação vençemos, tanba ne’e konvida ita hotu mai ita hamutuk ho Governu atu enkara dezáfiu boot atu kontrola COVID-19 no salva Timoroan atu labele mate tanba COVID-19 no mós labele mate tanba hamlaha,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, Parlamentu Nasionál.

Projetu-lei númeru 26/V/3a kona-ba autorizasaun renovasaun Estadu Emerjénsia ho artigu hamutuk 12. Artigu 1 fó autorizasan ba Prezidente Repúblika renova deklarasaun Estadu Emerjénsia fundamenta iha substánsia situasaun kalamidade públika, artigu 2 kona-ba ámbitu territoriál, artigu 3 kona-ba durasaun Estadu Emerjénsia, artigu 4 kona-ba espesifikasaun direitu sira, artigu 5 kona-ba apoiu Forsa Armada iha autoridade administrativa sivíl nian.

Nune’e mós artigu 6 kona-ba garantia direitu sidadaun sira, artigu 7 kona-ba órgaun soberania, artigu 8 kona-ba foru sivíl no asesu ba tribunál sira no PDHJ, artigu 9 kona-ba funsionamentu órgaun dirasaun no fiskalizasaun, artigu 10 kona-ba ezekusaun deklarasaun no artigu 11 (entrada ein-vigór).

Entretantu artigu 3 (durasaun) hosi artigu 11 iha lei autorizasaun ne’e prevee, renovasaun deklarasaun Estadu Emerjénsia ba períodu loron 30 tán (30 dias), hahú hosi 00.00 oras iha loron 03 abríl 2021 (sábadu) no termina iha oras 23.59 iha loron 2 fulan-maiu 2021 (domingu) ho parsialmente suspende ezersísiu balun.

Nune’e mós artigu 4 (espesifikasaun direitu sira) define suspende sirkulasaun internasionál, direitu liberdade no liberdade sirkulasaun no fixasaun rezidénsia, direitu reuniaun no manifestatasaun, liberdade kultu (culto), direitu edukasaun no direitu rezisténsia.

Bankada Frente Revolusionária Timor-Leste Independente (FRETILIN), Deputadu Antoninho Bianco, hateten Governu nia rezultadu servisu luhosi Sentru Integradu ba Jestaun Krize (CIGC-sigla portugés) to’o ohin laiha ema ida mate tanba COVID-19.

“Ita preparadu, ita organizadu. Ba oin Parlamentu Nasionál nia pozisaun ne’e atu fó apoiu tanba inimigu ne’e iha mundu tomak entaun ita mós konsidera inimigu komún, tanba ne’e ezije ema hotu nia servisu hamutuk, hanoin hamutuk hodi halo asaun hamutuk kombate COVID-19,” Deputadu Bianco hateten.

Bankada FRETILIN rekomenda ba membru Governu hakbesik ba komunidade afetadu hodi apoia ai-haan nune’e povu labele mate tanba hamlaha.

Reprezentante Bankada Congresso Nacional de Reconstrução de Timorense (CNRT), Deputada Virgínia Ana Belo, hateten restrinje ema-nia direitu liuhosi Estadu Emerjénsia maibé husik hela buat balun tanba membru Governu sira la hola medida adekuada hodi fó resposta ba sósiu-ekonómika iha rai-laran.

“Ami hakarak hatene relatóriu ezekusaun fundu COVID-19 hahú hosi 2020 no 2021, ba ami-nia bankada haree katak rekuperasaun ekonómika falla totál liuliu cesta bázika, presiza haree sé mak bele simu cesta bázika ne’e. Mai ho planu ho oioin, mai ho orsamentu oioin maibé to’o ikus falla totál,” nia dehan.

Bankada CNRT husu Governu fó apoia ba ema-ne’ebé lori mikrolete, taxista sira tanba aplikasaun serka sanitaria ne’e ema hotu labele halo atividade ekonómika.

Reprezentante Bankada Partidu Libertasaun Populár (PLP), Deputada Domingas dos Santos, hato’o votu a-favór ba deklarasaun Estadu Emerjénsia ba dala-XII.

“Bankada apresia medida Governu nian kona-ba serka sanitária no konfinamentu obrigatóriu ne’ebé prevene komunidade sira iha área fronteira, liuliu iha área Fatumean nian. Bankada PLP observa maske liña-frente sira hasoru difikuldade maibé sira esfrosu nafatin,” nia dehan.

Nia dehan, PLP husu Governu kontinua aplika serka sanitária no konfinamentu obrigatóriu hodi suspende nafatin atividade kulturál, rejilioza no atividade sira seluk. Bankada PLP mós husu Governu oferese ai-han ba komunidade iha aplikasaun serka sanitária ne’e.

Xefe Bankada Partidu Demokrátiku (PD), António da Conceição, hateten PD prova ona saida mak ba interese komún iha Parlamentu Nasionál.

“Saúde públiku ne’e ami nafatin fó votu a-favór no mós ba orsamentu, firme iha ami-nia desizaun. Bankada PD ladauk vota abstensaun muito menus kontra,” Xefe Bankada PD hateten.

Nia hateten, ladún kmanek no la furak bainhira pandemia COVID-19 sai opurtunidade atu Governu labele hala’o dezenvolvimentu ekonomia rai-laran nian.

“Ita bele haree iha Indonézia, COVID-19 ne’e hamate ema barak maibé dezenvolvimentu la hapara,” nia hateten.

Jornalista: Evaristo Soares Martins

Editór: Cancio Ximenes

 

HAKEREK NO HATÁN

Please enter your comment!
Please enter your name here