Prezidente Parlamentu Nasionál, Aniceto Longuinhos Guterres Lopez.

DILI, 30 marsu 2021 (TATOLI)—Parlamentu Nasionál (PN), abam, sei halo debate kona-ba pedidu autorizasaun ne’ebé propoin hosi Prezidente Repúblika, Francisco Guterres ‘Lú Olo’, hodi halo renovasaun Estadu Emerjénsia ba dala-XII ba territóriu nasionál tomak.

Notísia Relevante: PR husu PN atu renova Estadu Emerjénsia

Mensajen Prezidente Repúblika nian ne’e tama iha Parlamentu Nasionál iha loron 29 marsu 2021 lorokraik.

Ho pedidu hosi Xefe Estadu ne’e, Prezidente Parlamentu Nasionál marka ona plenária estraordinária ida ba aban ho ajenda únika estensaun Estadu Emerjénsia.

“Ajenda prepara hotu ona, data (renovasaun) markada ba aban, labele liu ona tanba kinta-feira ne’e loron feriadu no aban komesa dadeer, sedu no hotu-hotu konkorda aban plenária to’o 13.00 de’it,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi konferénsia imprensa, iha uma fukun, tersa ne’e.

Nia hatutan, tempu ba diskusaun to’o de’it 13.00 no lokraik Gabinete Prezidente Parlamentu no Casa Civil Prezidénsia Repúblika nian rezolve kedas promulgasaun no publikasaun, nune’e iha loron 2 abríl vigora kona-ba estensaun Estadu Emerjénsia ne’e.

Nia dehan, autoriza ka la autoriza ne’e depende ba desizaun hosi reprezentante povu sira iha Parlamentu Nasionál.

Prezidente Parlamentu Nasionál ne’e fó-sai katak, debate ne’e sei hetan transmisaun direta hosi Rádiu no Televizaun Timor-Leste (RTTL ep) no Rádiu Parlamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here